Sucès internazionâl pe Neuroradiologjie Interventistiche di Udin
lunis 14 di Avrîl dal 2025
Tal ultin fin setemane, a Buri, e je stade fate une impuartante cunvigne di neuroradiologjie interventistiche. L’event al à rapresentât une ocasion significative pai diviers specialiscj, che a àn podût discuti e confrontâsi cui dispositîfs plui avanzâts. Al incuintri a àn partecipât i esperts internazionâi plui impuartants, rivâts dai istitûts specializâts di dute Europe e dai Stâts Unîts.
L’event al è stât organizât par fevelâ dai dispositîfs intrasaculârs plui modernis (ven a stâi dispositîfs posizionâts midiant di un microcatetar cu la vuide dai rais x dentri de sache aneurismatiche), doprâts par tratâ i aneurismis celebrâi, che a permetin di frontâ chestis patologjiis in maniere eficace, rapresentant une alternative tant mancul invasive a pet de soluzion chirurgjiche. In doi dîs, i professioniscj a àn podût discuti di câs complès par scambiâsi e condividi lis proceduris di cure plui valevulis, doprant i dispositîfs di ultime gjenerazion.
Tal organizâ l’event, il contribût dal dotôr Vladimir Gavrilovic, responsabil de Neuroradiologjie Interventistiche de ASUFC, al è stât rilevant: “O sin pardabon contents de rispueste che o vin vût de bande dai esponents internazionâi plui impuartants in chest setôr: il podê confrontâsi e presentâ i nestris risultâts in presince di specialiscj di chest nivel al è fondamentâl par rivâ a ufrî no dome a Udin, ma a dute la regjon, soluzions clinichis modernis e avanzadis ae popolazion”.
Pe iniziative, a son stadis essenziâls lis struturis di Angjiografie e di Radiologjie Interventistiche de ASUFC, direte dal dotôr Massimo Sponza, e di Neurochirurgjie, direte dal dotôr Marco Vindigni.
“La neuroradiologjie e je un mont in evoluzion continue e e à bisugne di une strategjie multidissiplinâr cun dentri figuris diviersis, par podê garantî al pazient che al sedi cjapât in caric in maniere plui eficace – al à dit Gavrilovic – Cheste ocasion nus à dimostrât che o sin su la strade juste, ma o volìn continuâ a stâ al pas cu la inovazion e garantî a Udin un centri di ecelence, che za vuê al regjistre cirche 250 intervents neurovascolârs par an, di là di dute la ativitât di diagnostiche cerebrovascolâr”.