"Nassi a Udin": il progjet comun de Cliniche Ostetriche e dal nît dal Ospedâl Sante Marie de Misericordie par svicinâ al percors di gjenitorialitât

I neogjenitôrs a podaran visitâ la Cliniche Ostetriche, direte de professore Lorenza Driul, e il Nît, diret de dotore Carla Pittini, te lôr sede gnove, logade tal 2° plan, dal paveon 7 dal presidi ospedalîr “Sante Marie de Misericordie”, a partî dai 6 di Setembar dal 2023.

La gnove struture e je dotade di une organizazion e di une tecnologjie di ecelence che a permetin il rispiet de fisiologjie e de naturalitât dal part, e tal stes timp a permetin nivei alts di sigurece stant l'ambient e lis professionalitâts disponibii.

Ostetrichis, infermieris dal nît, OSS (operadôrs sociosanitaris) e miedis in formazion specialistiche a podaran vuidâ lis visitis tal bloc Travai/Part, te aree di degjence de Ostetricie e tal Nît.

Il fin al è chel di svicinâ lis feminis e lis lôr fameis ae struture par ridusi l'impat cun ce che no si cognòs cuant che si è intune cundizion delicade, o ben chê dal travai e dal part, che e pues gjenerâ insigurece e pôris.

Rinfuarcî la confidence cul ambient al pues permeti un ategjament plui seren intun moment cussì particolâr pai gjenitôrs tant che la nassite di un fi.

Lis visitis si podaran fâ il prin e l'ultin miercus di ogni mês, in doi oraris:

• 1° grup des 18:00 aes 18.30 
• 2° grup des 18.30 aes 19.00

I grups a saran componûts di 5 feminis e e je la pussibilitât di acompagnament de bande dal operadôr di supuart (caregiver) par ognidune di lôr.

Stant che i puescj a son limitâts, e covente la prenotazion telefonant ae segretarie de Neonatologjie al numar 0432 552677, di lunis al vinars, des 8:00 aes 15:30.

A podaran prenotâ lis feminis tacant de 25^me setemane di gjestazion, cun prioritât par chês plui dongje dal tiermin de gravidance.

In câs di urgjencis/emergjencis, lis visitis a podaran limitâsi dome a cualchi zone di chês descritis, e cu la esclusion de struture che e je coinvolte te gjestion de urgjence, ancje cence preavîs.