Mitral Day: from diagnosis to treatment
joibe 13 di Avrîl dal 2023
Vinars ai 14 di Avrîl a Udin, un apontament impuartant par specialiscj cardiochirurcs e cardiolics
Vinars ai 14 di Avrîl aes 15.00 tal Ospedâl di Udin si davuelzarà l’event “Mitral Day: from diagnosis to treatment” inmaneât de Cardiochirurgjie dal ospedâl Sante Marie de Misericordie, che di pôc e je sot de vuide dal dotôr Igor Vendramin.
Un apontament impuartant pai specialiscj dal setôr che a varan mût di confrontâsi sul teme, une vore atuâl, de patologjie mitraliche intune prospetive moderne: si darà grant spazi ai metodis di imaging, dal presint e dal futûr, e aes ultimis tecnichis di riparazion miniinvasive de valvule mitraliche, za dopradis di timp de struture udinese.
Cheste zornade e sarà ancje la ocasion par presentâ progjets didatics e formatîfs inovatîfs che si stan fasint te Cardiochirurgjie dal Ospedâl di Udin.
Plateformis multimediâls di gnove tecnologjie a permetaran une interazion simpri plui grande tra docents, specializants e students, ancje di nosocomis diviers, e tra i miedis dal Hub e il teritori, midiant di une rêt facile di acedii e di doprâ. La realtât virtuâl imersive RVI e sarà la espression massime di un model didatic e formatîf inovatîf che al à za dimostrât di vê grandis potenzialitâts di aprendiment. La RVI e je une modalitât particolâr di fruizion di contignûts midiant visôrs (dal inglês VR - Virtuâl Reality) là che l'utent al è contornât di un mont virtuâl, che cun chel al pues interagjî, incressint il coinvolziment e facilitant la acuisizion di informazions cuntune eficacie superiôr a pet di cualsisedi altri strument tradizionâl e multimediâl.
La Cardiochirurgjie di Udin e à savût mantignî intai agns nivei di ecelence in ambit nazionâl e internazionâl midiant di passion, dedizion, creativitât e tecniche. La ricercje e l'otigniment di competencis grandis in ogni setôr di cheste dissipline - dal traplant cardiac ai sistemis di assistence mecaniche cardiocircolatoris, de chirurgjie plui inovative de aorte aes impostazions miniinvasivis pal tratament des patologjiis de valvule - al à permetût di pôc di vierzi la Scuele di Specialitât di Cardiochirurgjie.
Pe struture al è un ricognossiment prestigjôs, pal impuartant e continui lavôr fat in ambit assistenziâl e sientific e che al permet ae Aziende Sanitarie Universitarie Friûl Centrâl di confrontâsi sul stes nivel cu lis realtâts nazionâls, academichis e sanitariis, plui prestigjosis e storichis. Un grant merit pal otigniment di chescj obietîfs al va dât al Professôr Ugolino Livi, che di pôc timp al à concludût la sô ativitât te ASUFC: cul so impegn e cu la passion, al à savût fâ rivâ la Cardiochirurgjie di Udin ai plui alts nivei nazionâi.
Il diretôr de Cardiochirurgjie, il dotôr Igor Vendramin: “La ricercje sientifiche, la inovazion tecnologjiche e la ideazion di impostazions metodologjichis gnovis a son ae fonde de evoluzion costante de medisine e de chirurgjie moderne. Ma dut chest al pues jessi fat dome cu lis intuizions e la professionalitât di personis dedicadis e apassionadis. Un agrât sincîr al va al Dotôr Denis Caporale, Diretôr Gjenerâl de ASUFC, che al à di simpri crodût in chestis iniziativis sostignint progjets di ricercje e di formazion; al Dotôr Pascolo e ae struture che al dirêç (Tecnologjie de Informazion e de Comunicazion), a Giancarlo Pengo (fondadôr de Surgical Video Production) pal entusiasim e pes competencis tecnologjichis che al à metût simpri a disposizion de Aziende. Infin, un gracie particolâr a ducj i coleghis (miedis, infermîrs, tecnics, oss, personâl aministratîf) che in chescj agns a àn condividût chest percors e a àn contribuît in maniere sostanziâl a otignî chescj obietîfs”.