"Mettiamoci a fuoco": in Cjargne, laboratoris par zovins dai 11 ai 19 agns

L’Istât nol rive mai? Nô o sin za culì! A tornin a tacâ i laboratoris “Mettiamoci a fuoco” par fantats e fantatis de Cjargne dai 11 ai 19 agns, che vie pe stagjon estive a podaran esprimi la lôr creativitât vuidâts di artesans e artiscj locâi.

Lis propuestis a disposizion a son 6: Art dal teatri, Dissen, Intai di Mascaris di len, Fotografie, Cinc sens: cjaminadis e esperiencis sensoriâls, Zûcs di Taule e Game Design.

La iniziative e je promovude dal Servizi Sociâl dai Comuns tal ambit teritoriâl de Cjargne – ASUFC, in colaborazion cu la Comunitât di Mont de Cjargne e cu la Cooperative Itaca; cheste e je la edizion numar sîs, une ocasion uniche pai zovins di metisi in zûc e provâ esperiencis diferentis!

Ducj i laboratoris a son gratuits e si fasaran a Tumieç, te sede dal CoLab, in vie Carnia Libera 1944, te gnove sede dal Centro per le Famiglie, in vie G. Matteotti 5, e te Biblioteche civiche A. Pittoni.

Lis datis, i oraris e lis sedis dai diviers Laboratoris si puedin viodi tal codiç QR de locandine promozionâl.

Trê propuestis a son za stadis colaudadis: il Laboratori di Fotografie, che al è diret di Emilia De Monte e dividût in doi turnis, daûr de esperience dai partecipants; Intai di mascaris di len, diret di Ermanno Plozzer; Arteatri cun Daniela Cargnelutti.

Trê propuestis, invezit, a son gnovis:

• Dissen: La forme des emozions, diret di Barbara Picotti. I partecipants, cu la vuide atente de artiste, a ciraran di dâ forme al lôr mont interiôr;
• I 5 sens: cjaminadis e esperiencis sensoriâls, cu la vuide di Marco Pirona, che al puartarà i zovins a scuvierzi i 5 elements de bandiere tibetane midiant di escursions e di esperiencis sensoriâls;
• Zûcs di Taulee Game Design, cu la direzion di Nicole Straulino e Marco Andreoli: un spazi dedicât a scuvierzi i zûcs di taule dulà che i fruts a podaran fâsi cjapâ dentri di zûcs gnûfs e provâ a progjetâ e creâ un di plante fûr.  

Ce spietaiso? No stait a fâusai dome contâ… NOTAITSI!

Par informazions e iscrizions a un o a plui laboratoris si pues contatâ Nicole Straulino via WhatsApp al numar 331.26.74.511.

Lis adesions a varan di rivâ dentri di miercus ai 19 di Jugn dal 2024; si acetaran par ordin di rivade fin al numar massim di partecipants previodût par ogni laboratori; e fasarà fede la date di consegne dai documents di iscrizion firmâts, che si mandaran in blanc di compilâ cuant che si fâs la domande par WhatsApp.