"Mettiamoci a fuoco": laboratoris in Cjargne par zovins dai 11 ai 19 agns
joibe 5 di Jugn dal 2025
Iniziative inmaneade dal Servizi Sociâl dai Comuns dal Ambit Teritoriâl de Cjargne
Puntuâi come ogni an, ancje pal Istât dal 2025 a tornin i laboratoris “Mettiamoci a fuoco”, par zovinis e zovins de Cjargne dai 11 ai 19 agns (de classe 1e de Scuele secondarie di I grât frecuentade chest an scolastic), che a varan mût di divertîsi e meti ae prove la proprie dimension creative, esplorative e espressive vuidâts di educadôrs e artiscj locâi.
La iniziative, promovude dal Servizi Sociâl dai Comuns dal Ambit Teritoriâl de Cjargne, e realizade de Cooperative Itaca, cul coordenament di Sara Burba, rivade cheste an ae edizion numar siet, e previôt laboratoris gratuits che si fasaran a Tumieç te sede dal Centri pes Fameis de Cjargne in vie G. Matteotti 5/I. Il progjet al fâs part de programazion des ativitâts previodudis dal stes Centri e poiadis de Regjon Friûl-Vignesie Julie e dal Dipartiment Politichis pe Famee; si fasaran ancje te Biblioteche civiche A. Pittoni di Tumieç (dome par un dai Laboratoris).
Lis propuestis
I zovins a podaran sielzi tra cinc propuestis: Game Design, Fotografie, Zûcs di taule e di rûl, Teatri, Nature Survival.
I Laboratoris che intai agns si son dedicâts ae esplorazion de art pitoriche e dal dissen, a fasin un upgrade mudantsi intal laboratori dal dut gnûf di Game Disign: la artiste Barbara Picotti e vuidarà i fantats ae scuvierte dal percors articolât e complès di ideazion, progjetazion e realizazion di un zûc di taule, ancje pe part grafiche e pitoriche, essenziâl pe sô comunicabilitât e par rivâ a zuiâ. Un Laboratori dividût in doi turnis di sîs incuintris ognidun, un il lunis di matine des 9:00 aes 12:00 e un il lunis dopomisdì des 14:00 aes 17:00, dai 30 di Jugn ai 4 di Avost.
Il Laboratori di Fotografie, vuidât di Emilia De Monte, si davuelzarà ancje chest in doi turnis, un di martars (ai 1, 8, 15, 22, 29 di Lui) e un di miercus (a2, 9, 16, 23, 30 di Lui) simpri des 14:00 aes 17:00. Il Laboratori al sarà dedicât a esplorâ la dimension emotive e cemût che la fotografie e sedi un imprest ecelent par descrivile, tacant dal mont che o vin ator di nô par rivâ a componile midiant des prospetivis di ducj i partecipants al Laboratori.
Intai miercus ai 16-23-30 di Lui e ai 6 di Avost e vinars ai 8 di Avost si zuie! Ducj in Biblioteche a Tumieç des 14:00 aes 16:30 pal Laboratori Giochi da tavolo e giochi di ruolo. No stait a spietâsi alc che o savês za: Marco Andreoli, adun cun cualchi volontari apassionât di zûcs di taule us vuidaran intun mont plen di tancj stimui e divertiment, dut di zuiâ insiemi cun chei altris partecipants!
Al cambie aspiet ancje il Laboratori di Teatriche al sarà vuidât di Lucia Linda, atore professioniste de Compagnie teatrâl Teatro della Sete. “Il percors espressîf che si propon, al dîs il Teatro della Sete, al è finalizât a sperimentâ la gjestion dal spazi in moviment, la scolte di chel altri orientât a creâ acuardi di grup, la gjestion dal moviment in relazion al ritmi e al timp, il disvilup de espressivitât corporie e de energjie di insiemi, la capacitât di imitazion e di distinzion, la stimolazion dal pinsîr critic”. No si lavorarà pe prestazion e pe rapresentazion, ma pluitost pal percors che il singul e il grup a fasaran insiemi, in siet incuintris dai 26 di Jugn ai 7 di Avost, ogni joibe des 10:00 aes 12:00.
Infin il Laboratori Nature Survival: savêsi orientâ in ogni situazion, costruî un ripâr intal bosc, impiâ un fûc, cjatâ alc di mangjâ e preparâlu, gjestî une situazion di pericul e prestâ socors in situazion di emergjence. Une esperience uniche in cinc incuintris vuidâts di Marco Pirona, ai 10, 17, 24, ai 30 di Lui e ai 7 di Avost des 9:00 aes 13:00 tra Tumieç, Dieç, il glereâl de Bût, il Ripâr Fornas.
Ce spietaiso? No stait a contentâsi di sintî a contâ... NOTAITSI!
Par informazions e iscrizions a un o a plui Laboratoris (la partecipazion a plui di un Laboratori e dipendarà dal numar di iscrizions, inte otiche di dâ a ducj la pussibilitât di partecipâ almancul a un Laboratori) si pues contatâ Gaia Pecile vie WhatsApp al 3351266621 o vie messaç di pueste eletroniche scrivint a gaia.pecile@asufc.sanita.fvg.it.
Lis adesions a varan di rivâ dentri di martars ai 3 di Jugn dal 2025, a saran acetadis par ordin di prioritât (e fasarà fede la date di riconsegne de documentazion di iscrizion firmade, che e sarà inviade in blanc tal at de domande su WhatsApp o par pueste eletroniche) fin a rivâ al numar massim di puescj fissâts par ogni Laboratori.
