Servizi sociâl dai Comuns dal Ambit Teritoriâl de Cjargne: Laboratoris "Mettiamoci a fuoco"
Cul lôr hastag #MF26, pal Istât dal 2026 in Cjargne ancje chest an a son pronts par partî i Laboratoris “Mettiamoci a fuoco” pai fruts e i fantats tra i 11 e i 19 agns (de classe 1e de Scuele secondarie di prin grât frecuentade in chest an scolastic), che cumò a puedin preparâsi a distudâ i schermis e a impiâ la creativitât, une esplosion di ideis, di art e di aventuris dal dut a gratis. Al è timp fin a vinars ai 5 di Jugn par notâsi.
La iniziative e je rivade ae otave edizion, e je promovude dal Servizi Sociâl dai Comuns dal Ambit Teritoriâl de Cjargne – Aziende Sanitarie Universitarie dal Friûl Centrâl e realizade de Cooperative Itaca cul coordenament di Sara Burba.
I laboratoris a saran sore nuie e si fasaran a Tumieç te sede dal Centri pes Fameis de Cjargne in vie G. Matteotti 5/I, stant che a fasin part de programazion des ativitâts previodudis dal Centri stes e a son supuartadis de Regjon Friûl-Vignesie Julie e dal Dipartiment des Politichis pe Famee, e te Biblioteche civiche A. Pittoni di Tumieç (dome un dai Laboratoris).
Lis propuestis di chest an a previodin 8 laboratoris: Fotografie, Anime tarot, Ceramiche e linocut, Outdoor challenge, Intai di mascaris di len, Teatri, Zûcs di rûl e di Taule.
Fotografie
Il Laboratori di Fotografie, vuidât di Emilia De Monte, si davuelzarà in doi turnis, un di martars (ai 16/23 di Jugn, 7/14/21/28 di Lui e 4 di Avost) e un di joibe (ai 18/25 di Jugn, 9/16/23/30 di Lui e 6 di Avost) simpri des 14:00 aes 17:00.
Al sarà un percors dedicât aes emozions e al podê de fotografie di dâur vôs cence bisugne di peraulis. Tai incuintris tu impararâs a caturâ la realtât ator di te par dopo tornâ a metile adun insiemi, cumbinant la sensibilitât e la vision uniche di ogni partecipant.
Anime tarot
Apassionâts di dissen e dal stîl manga a rapuart, il laboratori Anime tarot al è ce che o spietavis! Vuidâts de artiste Barbara Picotti, o sielzarês un Arcan Maiôr (il Mat, il Soreli, i Amants...) e lu piturarês in maniere dal dut gnove tal stîl anime e de culture gjaponese. Dal schiç a lapis ae ilustrazion finâl, o lavorarês su colôrs e composizion par creâ une cjarte che e fevele di voaltris. Une esperience uniche che us viodarà impegnâts di lunis dopomisdì des 14 aes 17 dai 15 di Jugn ai 3 di Avost.
Âstu voie di sporcjâti lis mans e di liberâ la tô fantasie? Alore no stâ a cjapâ impegns tes buinoris di miercus des 10 aes 12 dai 17 di Jugn ai 22 di Lui!
Ceramiche e linocut
Il laboratori di ceramiche e linocut, tignût di Marie-Sophie Goossens, al è un viaç creatîf dopli parcè che tai prins 3 incuintris tu plasmarâs la arzile par creâ ogjets unics (sperimentant parfin il calc di plantis e fueis par un efiet che al lasse a bocje vierte!), e tai ultins 3 tu deventarâs un mestri de stampe artesanâl, intaiant il linoleum par trasferî i tiei motîfs su cjarte o su stofe.
Outdoor challenge
Cinc incuintris a contat cu la nature e cul teritori, al è chest ce che tu cjatarâs tal laboratori Outdoor Challenge! Se no ti plâs stâ fer, cheste e je la sfide par te: ti spietin une gare di orienteering fra Tumieç e la Tor Picote, un trekking straordenari su la piche dal Duron, la magjie dal tîr cul arc, la costruzion di un vêr acuilon e ativitâts sensoriâls unichis tal viert. Cheste esperience e je vuidade di Marco Pirona e si davuelzarà lunis ai 29 di Jugn, tes zornadis dai 6/13/27 di Lui e dai 3 di Avost des 9 aes 13, il puest dulà cjatâsi al è il Centri pes Fameis de Cjargne.
Intai di mascaris di len
Une vore preseât, al torne il cors di Intai di Mascaris di Len, tignût dal artesan Ermanno Plozzer ducj i miercus dopomisdì, des 14 aes 17, tacant dai 26 di Jugn fin ai 5 di Avost. Vuidât des mans espertis dal artesan, tu impararâs a doprâ i imprescj dal mistîr e a cognossi la materie prime par podê sculpî, dopo di vêle imagjinade e dissegnade, la muse che ti rapresente di plui!
Teatri
Cu la conduzion di Lucia Linda, atore de Compagnie teatrâl Teatro della Sete, al torne il laboratori di Teatri dutis lis joibis, dai 25 di Jugn ai 6 di Avost, des 10 aes 12. “Porta Accanto” (La puarte dongje) al è il titul dal percors ideât par chest an parcè che “Jessi vicins nol vûl dî par fuarce cognossisi...". Il zûc dal teatri al covente propit par chest, par sbassâ lis difesis, par fâ zirâ la mantie e vierzi chês puartis che a son restadis sieradis. Un laboratori inmagant par cucâ difûr, superâ lis timidecis iniziâls e scuvierzi un spazi comun dut gnûf di abitâ e di condividi cun chei altris.
Zûcs di rûl e di taule
Sêstu pront a metiti tai bregons di un aventurîr ardît o a planificâ la strategjie perfete par bati i tiei amîs? Che tu sedis un apassionât dai zûcs di rûl o un amant dai zûcs classics, o vin la matine perfete par te. Di fat al torne il laboratori di Zûcs di rûl e di taule, vuidât di Cristian Pressacco, educadôr professionâl e espert di zûcs di rûl e di taule, ducj i lunis a buinore dai 22 di Jugn ai 3 di Avost, des 10 aes 12.30, te Biblioteche Civiche A. Pittoni di Tumieç
Cemût notâsi
Ce spietaiso? No stait a contentâsi di sintî a contâ... NOTAITSI!
Par informazions e iscrizions a un o a plui Laboratoris (la partecipazion a plui di un Laboratori e dipendarà dal numar di iscrizions, inte otiche di dâur a ducj la pussibilitât di partecipâ almancul a un Laboratori) si pues contatâ Nicole Straulino midiant WhatsApp al 331.2674511 o scrivint al recapit di pueste eletronichenicole.straulino@asufc.sanita.fvg.it.
Lis adesions, che a varan di rivâ dentri di vinars ai 5 di Jugn dal 2026, a saran acetadis par ordin di prioritât (e fasarà fede la date di riconsegne de documentazion di iscrizion firmade, che e sarà inviade in blanc al moment de domande su WhatsApp o par pueste eletroniche) fin a rivâ al numar massim di puescj fissâts par ogni laboratori.