“Metìnsi a fûc”: spetacul e mostre ae fin dai laboratoris
joibe 21 di Setembar dal 2023
Domenie ai 17 di Setembar aes 5 dopomisdì, li dal teatri dal Istitût Salesian don Bosco di Tumieç
Metìnsi in sene!
Domenie ai 17 di Setembar dal 2023 aes 5 dopomisdì, li dal teatri dal Istitût Salesian don Bosco di Tumieç, al larà in sene il spetacul ideât dai fantats, dutun cu la artesane Daniela Cargnelutti, vie pal laboratori di “Arteatro” cul titul “E jere une volte une flabe” dentri tal progjet “Metìnsi a fûc” - Istât 2023.
Il progjet Metìnsi a Fûc, promovût dal Servizi sociâl dai Comuns dal ambit teritoriâl Cjargne - Aziende Sanitarie Universitarie Friûl Centrâl, in colaborazion cu la Cooperative Itaca e la Comunitât di Mont de Cjargne e realizât in graciis dal impegn dal Ent Mostre Permanente de Cjargne, al à viodût vie pal Istât dal 2023 il coinvolziment di uns novante fantats e fantatis dai 11 ai 19 agns.
Il progjet, fat di siet laboratoris a gratis condusûts di artesans e di artiscj dal teritori, ancje chest an al à permetût ai fantats di lâ insot e di respirâ la essence de art che ogni tutôr, te sô specificitât, al à savût a dâur.
Vie pal laboratori di Fumet, i zovins, cu la artiste Barbara Picotti, a son lâts dentri tal studi dal Character Design; midiant di chest, a àn podût creâ personaçs origjinâi, tacant de analisi di formis, colôrs, stîi e dai lôr significâts.
Cul laboratori di Animazion, une tra lis novitâts di cheste edizion, condusût simpri de artiste Barbara Picotti, i fantats a àn podût provâ tecnichis tant che il stop-motion, il dissen classic, il dissen digjitâl e modelât cu la plastiline par fâ animazions origjinâls e divertentis, stiçant une componente impuartante dai umans: la creativitât.
Il laboratori di Fotografie al à dât la pussibilitât ai fantats, sot de vuide esperte de artesane Emilia De Monte, di tirâ fûr il lôr talent e di cjapâ incuadraduris unichis e origjinâls in plui zonis de citât di Tumieç e di confrontâsi cun diviers stîi espressîfs.
Ancje in cheste edizion i fantats si son metûts in zûc imparant a creâ une mascare partint di un cubi di len; par dut il cors Intai mascaris tal len, odôrs e rumôrs di scarpel a son lâts indevant, compagnâts dai insegnaments e dai conseis preziôs dal artesan Ermanno Plozzer.
Cul laboratori di Borsis e acessoris, lis fantatis, vuidadis de artesane Antonella Stafutti, dopo vê fate une ricercje dai colôrs e la seguitive creazion de stofe, a àn realizât des borsis unichis e origjinâls doprant ancje materiâl riciclât: il risultât al è straordenari!
La seconde novitât di cheste edizion al è stât il laboratori su la Art culinarie cjargnele, li che la artesane Daniela Cargnelutti e à compagnât i fantats intun viaç unic ae scuvierte dai savês e dai savôrs de art culinarie cjargnele tradizionâl: e je stade une esperience siore di gust e di profums che a san di cjase.
“E jere une volte une flabe” al è il spetacul ideât dai partecipants al cors di Arteatro, che cu la artesane Daniela Cargnelutti, a àn pensât di inmaneâ une opare dedicade ai plui piçui: dal sigûr al sarà di ce divertîsi!
Metìnsi in mostre!
Domenie ai 17 di Setembar dai 2023 aes 4 dopomisdì, li dal curtîl dal Istitût Salesian don Bosco di Tumieç a saran esponudis lis oparis fatis tai laboratoris di Fotografie, Fumet, Animazion, Borsis e acessoris e Intai mascaris tal len.
Di lunis ai 18 di Setembar dal 2023 la esposizion des oparis e larà indevant fintremai vinars ai 20 di Otubar dal 2023 in cheste maniere:
-Fotografie e Intai mascaris tal len li dal I.S.I.S. Fermo Solari;
-Fumet e Animazion li de Biblioteche di Tumieç;
-Borsis e Acessoris li dal Ent Mostre Permanente de Cjargne.