"Mapadure des dibisugnis di salût sessuâl e afetive di fruts, fantats e zovins"

A saran presentâts martars ai 30 di Setembar dal 2025, des 18.00 aes 19.30 te Aule Magne dal ISIS «Magrini Marchetti» a Glemone, i risultâts de Mapadure des dibisugnis di salût sessuâl e afetive di fruts, fantats e zovins che tal an scolastic 2024-2025 e à cjapât dentri cirche 800 students che a frecuentin lis Scuelis dal teritori.

Il progjet, che si clame Cognossi par prevignî, al è stât promovût de Rêt B*sogno d’esserci che i à assegnât il compit di metilu adun ae Associazion di Promozion Sociâl MisMàs.
La indagjin e à cjapât dentri i arlêfs des Scuelis Primariis (classis cuarte e cuinte), Secondariis di prin grât (dutis lis classis) e Secondariis di secont grât (de classe prime ae cuarte) dal teritori dulà che e opare la Rêt, che a cheste a aderissin i Comuns di Dartigne, Bordan, Scluse, Dogne, Glemone, Montenârs, Mueç, Osôf, Resie, Resiute, Trasaghis e Vençon.

La educazion ae sessualitât e je un dai imprescj plui impuartants pe promozion dal benstâ sessuâl des personis zovinis e une componente clâf de strategjie di prevenzion promovude de Organizazion Mondiâl de Sanitât. «Par intervignî cun eficacie, però, si à di partî de cognossince dai bisugns dai fruts, fantats e zovins», a marchin i promotôrs de iniziative.
«La Mapadure e je stade considerade une azion impuartante parcè che dome cognossint miôr la realtât di fruts, fantats e zovins al è pussibil promovi il benstâ intant dal disvilup psicosessuâl, rinfuarçâ i fatôrs di protezion e ridusi i pericui, costruî intervents smirâts e condividûts tra scuele, famee e comunitât, creant une fonde par meti in pîts progjets educatîfs zovevui e replicabii», a continuin i promotôrs.

La indagjin e à permetût di cjapâ sù informazions utilis par capî lis domandis e lis dibisugnis di fruts, fantats e zovins, lis lôr percezions e lis lôr crodincis su la sessualitât e la afetivitât, lis esigjencis dai insegnants, lis risorsis e lis mancjancis sul teritori.
Tal incuintri di martars ai 30 di Setembar a saran presentâts i risultâts de ricercje, lis esigjencis plui impuartantis vignudis fûr, lis prospetivis di lavôr pai prossims agns.

Si podarà partecipâ al incuintri ancje a distance, su la plateforme Lifesize midiant di chest leam: https://call.lifesizecloud.com/23934176 .

La Rêt B*sogno d'esserci, nassude tal an scolastic 2010-2011, e je impegnade inte realizazion di svariâts progjets, tra chescj il progjet «Inclusion» a pro des Scuelis de Infanzie, il Spazi di scolte psicoeducative a pro di gjenitôrs e insegnants di fruts dai 3 ai 14 agns, lis ativitâts di educazion digjitâl par cure de Associazione Media Educazione Comunità. In plui che dai dodis Comuns nomenâts parsore, la Rêt e je formade des Associazions Gjenitôrs dal ISIS «Magrini Marchetti», de Scuele Primarie di Ospedâl «Sante Striche» e de Scuele Primarie di Plovie, de Aziende sanitarie universitarie Friûl Centrâl, dal IAL Friuli-Venezia Giulia Impresa Sociale s.r.l. - Gemona del Friuli, dai Istitûts Comprensîfs di Glemone e Trasaghis, dai ISIS  «Magrini Marchetti» e «D’Aronco», des Scuelis Paritariis «Santa Maria degli Angeli» e dal Servizi sociâl dai Comuns dal ambit teritoriâl dal Glemonàs e dal Cjanâl dal Fier-Val Cjanâl.
MisMàs e je une associazion «plurâl» che e vûl stiçâ il cambiament midiant de inovazion sociâl.
L'obietîf finâl de organizazion al è chel di promovi «plui justizie sociâl e acessibilitât ae salût».
La Associazion si propon tant che «spazi di confront complès», buine di jentrâ in contat ancje cu lis fragjilitâts e cu lis «tematichis dificilis». MisMàs e lavore cuntune prospetive multidissiplinâr e transculturâl, creant rêts tra personis e contescj.

Par informazions: retebsognodesserci@gmail.com