Lis manovris pe vite: in place o imparìn a salvâ un frut
joibe 5 di Otubar dal 2023
Palme, domenie ai 8 di Otubar, des 14:00 aes 18:00
Domenie ai 8 di Otubar des 14.00 aes 18.00, a Palme, in Place Grande, sot de Loze de Gran Vuardie, pediatris specialiscj e infermîrs istrutôrs di rianimazion pediatriche SIMEUP de Regjon a saran a disposizion par dâ une dimostrazion pratiche su cemût intervignî tal câs di scjafoiament di un frut.
Coordenâts de dotore Elisabete Miorin, diretore de Struture di Pediatrie di Palme-Tisane e cul aiût di manichins pediatrics, i professioniscj a saran a disposizion par domandis, dâ conseis utii e mostrâ manovris semplicis che a permetin di salvâ la vite ai tancj zovins.
La Società Italiana di Medicina d'Emergenza Urgenza Pediatrica (SIMEUP) e organize ogni an in tantis placis l'event "Una manovra per la Vita” che si propon di sensibilizâ e di insegnâ ae popolazion, in particolâr a gjenitôrs, nonos e operadôrs de infanzie, lis manovris par salvâ la vite a un frut tal câs che al sedi daûr a scjafoiâsi cun alc di estrani.
Se si viodès un frut che al è daûr a scjafoiâ, al è normâl spaurîsi e restâ petrificâts: la uniche maniere par vinci la pôre e je chê di trasformâ lis cognossincis che si àn intun automatisim.
Di fat, a capitin ancjemò desenis di muarts ogni an te fasse di etât 0-4 agns par vie dal scjafoiament: in tancj di chescj câs si varès podût provâ a fâ alc cuntun intervent imediât che no simpri al è compatibil cu la spiete dai socors.
Savê cemût reagjî par timp intune situazion di cheste fate al pues fâ la diference par salvâ il frut.
L'event al è pensât par che pediatris e gjenitôrs si cjatin adun e par insegnâ ce che si à di fâ in chestis situazions di emergjence.
L'obietîf nol è dome fâ prevenzion e sensibilizâ su lis azions imediadis di fâ tal câs di scjafoiament, ma fâ in maniere che chestis manovris salvevite a deventin un automatisim. Il contat diret cui esperts, e il fat di provâ in maniere direte su manichins fats di pueste, a puedin jessi utii par imparâ lis manovris salvevite e par creâ chescj automatisims decisîfs in chescj moments di emergjence.