Pai proprietaris di edificis danezâts dal brut timp dai ultins dîs in Friûl-Vignesie Julie: modalitât straordenarie par rimovi e cjapâ sù l’amiant

Par vie dai ultins burlaçons bruts che a son stâts in plui bandis de regjon, la Direzion Centrâl pe Salût (DCS) cu la note dai 26 di Lui dal 2023 e à stabilît i criteris operatîfs che, in vie ecezionâl, a permetin di derogâ aes proceduris ordenariis previodudis tes “Liniis vuide finalizadis ae microracuelte di amiant di bande dai comuns e dai proprietaris di edificis civîls rev.  2023” aprovadis cun Delibere de Zonte Regjonâl n. 867 dal 1n di Jugn dal 2023.

La deroghe e je in vore fin ai 30 di Setembar dal 2023: e rivuarde dome chei edificis che a àn vût segnalâts al Comun competent i dams vûts pal brut timp di chescj ultins dîs, e no si apliche tai câs di:

• manufats che a contegnin amiant libar o cuntune base friabile;
• materiâi che par jessi puartâts vie si à di butâ jù muriduris;
• materiâi che par jessi puartâts vie si à di taiâju o rompiju;
  
  

In plui di ce che al è previodût des liniis operativis che o vin ditis chi parsore, par chês personis che dopo dai events atmosferics resints a vessin di cjatâ te lôr proprietât tocs di lastris o di manufats che a podaressin vê amiant, si furnissin chestis indicazions:

• tal câs che il manufat al fos di proprietât, si à di contatâ il Comun di competence par verificâ se il stes al risulte ripuartât tal archivi regjonâl dal amiant;
• verificâ cul Comun se une dite e je stade incjariade di ritirâ i refudums che a contegnin amiant e se a son disponibii i kit cui dispositîfs/materiâi necessaris pe rimozion;
• si à di rimovi i tocs daûr des modalitâts previodudis des indicazions operativis de DCS o dal Comun;
• in particolâr, prime di tacâ a seâ zardins e prâts, o di fâ passonâ lis bestiis, si à di verificâ che no sedin ator tocs di materiâi che a podaressin contignî amiant, par evitâ che si rompedin ancjemò di plui e par limitâ la dispersion di fibris tal ambient;
• dopo de racuelte dai framents, si àn di netâ i plaçâi, lis teracis e i marcjepîts privâts di pertinence, cuntune modalitât umide di maniere che lis fibris no si dispierdin vie tal aiar; dopo si à di meti dut intun stes sac, cun dentri ancje chel sporc che si cjape sù tes puliziis solitis;
• si à di lavâ ben i prodots dal ort cun aghe nete prime di mangjâju, miôr prime di vêju puartâts intun ambient sierât.