Ospedâl di Udin protagonist tes gnovis Liniis Vuide ESC 2025 su miocarditis e pericarditis

L'Ospedâl di Udin si conferme pont di riferiment internazionâl te gjestion des patologjiis inflamatoriis cardiachis. Pe prime volte, la Societât Europeane di Cardiologjie (ESC) e publiche vuê lis Liniis Vuide 2025 su miocarditis e pericarditis, un document di impuartance fondamentâl che al orientarà la pratiche cliniche tai prossims agns.

In gracie de esperience ricognossude a nivel mondiâl, la Struture Complesse di Cardiologjie di Udin e à vût un rûl di prin plan tal disvilup di chestis racomandazions:

• Il Prof. Massimo Imazio, Diretôr de Cardiologjie, al à davuelt il rûl di Chairperson dal grup di lavôr internazionâl.
• Il Dot. Valentino Collini al à davuelt la funzion di Coordenadôr, dant un contribût determinant ae scriture e armonizazion dal document.

Lis gnovis liniis vuide a son un travuart storic: pe prime volte i cardiolics di dute la Europe e oltri, a varan a disposizion racomandazions unificadis e inzornadis pe diagnosi e pe cure di miocarditis e pericarditis, patologjiis complessis che par jessi gjestidis a domandin competencis specialistichis e metodis multidissiplinârs.

"Chest risultât nol è dome un motîf di svant pe Cardiologjie di Udin, ma al testemonee la cualitât de ricercje e de assistence cliniche disvilupade tal nestri centri. Contribuî ae definizion dai standard europeans al vûl dî ufrî la nestre esperience ai pazients di dut il mont", al à declarât il Prof. Imazio.

Il coinvolziment diret de Cardiologjie di Udin intun progjet di cheste impuartance al conferme il so rûl tra lis ecelencis talianis e europeanis, cuntun impat concret su la salût dai pazients e su la inovazion terapeutiche.