“Il viaggio dentro di noi. Azione!” – Laboratori di cine par zovins a Tumieç

Si vierç la stagjon des ativitâts espressivis, cul Laboratori di Cine “Il viaggio dentro di noi. Azione!”.
Ducj i laboratoris estîfs par preadolessents e adolessents che il Servizi Sociâl dal Comuns dal ambit teritoriâl de Cjargne (Aziende Sanitarie Universitarie dal Friûl di Mieç) al propon in colaborazion cu la Cooperative Itaca, cui artesans e i artiscj dal teritori, a vignaran presentâts in curt.

I incuintris dal laboratori di cine si tignaran ai 18 di Jugn, des 15:00 aes 17:00, ai 19 di Jugn, des 14:00 aes 17:00, ai 20 e ai 21 di Jugn des 9:00 aes 17:00 e il dopomisdì dai 24 di Jugn a Tumieç li dal CoLab. La struture e je stade metude a disposizion de Comunitât di Mont de Cjargne.
Cul laboratori, si realizarà un curtmetraç che al fevele de persone e dal propri percors interiôr e esteriôr.

I zovins e lis zovinis che a partecipin a podaran sperimentâ ducj i rûi diferents (senegjatôrs, regjiscj, atôrs, impleâts aes ripresis, e v.i.) che a contribuissin ae produzion di un “curt”, de sô ideazion fin al prodot finît.

I preadolessents dai 12 agns insù che a son passionâts di cine si cjataran cun Elia Adami, senegjatôr e diretôr artistic, e Federico Gallo, fotograf e regjist, che ju vuidaran dilunc dal laboratori.

Intai prins doi dîs, si fasaran ativitâts di preparazion pes fasis des ripresis che si davuelzaran intes zornadis dopo (al pues jessi che il program al vignedi modificât daûr des necessitâts des ripresis, ven a stâi daûr dal meteo e de lûs).

Si pues iscrivisi dentri di vinars ai 31 di Mai dal 2024, contatant Gaia Pecile su WhatsApp al numar 3351266621, o mandant une mail a gaia.pecile@asufc.sanita.fvg.it.

Lis adesions si cjaparan sù par ordin di rivade: il laboratori al tache cuant che si son notadis almancul 10 personis.