Vôs, musiche, cine, emozions e relazions intai laboratoris pai fantats de Cjargne
lunis 26 di Jugn dal 2023
Par cure dal Servizi Sociâl dai Comuns dal ambit teritoriâl de Cjargne
Par cure dal Servizi Sociâl dai Comuns dal ambit teritoriâl de Cjargne
“Fermiti… e scolte cemût che ti respire tra lis mans la vite”: chest al è il fîl che al lee i cinc laboratoris creatîfs, espressîfs, ae ricercje e ae scuvierte di se e di chel altri che il Servizi Sociâl dai Comuns dal ambit teritoriâl de Cjargne - ASUFC, in colaborazion cu la Cooperative Itaca e graciis ae disponibilitât dai spazis dade dal Comun di Tumieç e de Comunitât di Mont de Cjargne, vie pal Istât al organize a Tumieç pai fantats e lis fantatis adolessents de Cjargne.
Elsa Martin, cjantante e docente de vôs, e Francesca Cimenti, educadore de Cooperative Itaca, a vuidaran i fantats, de 1me Superiôr in sù, “Dentro la mia voce”, un spazi viert ae creativitât e ae espression, un viaç ae scuvierte de proprie vôs, midiant dal sun e de peraule poetiche, parcè che ognidun di nô al à un so stamp vocâl specific, unic e iripetibil, che si esprim intal sun ma ancje inte scriture. Iscrizions dentri dai 29 di Jugn contatant Gaia Pecile par WhatsApp al 3351266621; i incuintris si davuelzaran martars ai 4, 11 e 18 di Lui des 9.00 aes 12.00; vinars ai 21 di Lui des 14.00 aes 17.00; miercus ai 9 di Avost des 9.00 aes 12.00; vinars ai 11 di Avost des 9.00 aes 12.00.
Ritmi. Conession. Condivision: dut chest al è Rhythm Circular Lab! I fantats dai 14 ai 20 agns a podaran sperimentâ la bielece dal sunâ in cercli tambûrs e percussions bogns di creâ ocasions divertentis di incuintri tra lis personis. Federico Pace, educadôr e musicist professionist, che al curarà il laboratori, al garantìs che nol covente vê nissune competence musicâl, dome la curiositât di sperimentâ! Al è pussibil notâsi al laboratori fin ai 13 di Lui contatant Gaia Pecile par WhatsApp al 3351266621; il viaç inte musiche si fasarà martars ai 18 e ai 25 di Lui e il 1n e ai 8 di Avost des 14.30 aes 16.30 e vinars ai 21 e ai 28 di Lui e ai 4 di Avost des 10.00 aes 12.00.
Ai apassionâts di cine dai 14 agns in sù Elia Adami, senegjatôr e diretôr artistic, e Federico Gallo, fotograf e regjist, a proponin “Il viaggio dentro di noi”; un percors di scuvierte, creazion e realizazion basât suntune schirie di imprescj bogns tant te vite cuotidiane che te realizazion di une opare cinematografiche. Iscrizions dentri dai 3 di Avost contatant Gaia Pecile par WhatsApp al 3351266621; i partecipants a varan la pussibilitât di scrivi la lôr storie/senegjature in ocasion dai incuintris programâts pai 24, 25, 28 di Avost e pal 1n e pai 4 di Setembar des 14.30 aes 17.00, intant che ai 6 e 7 di Setembar i apontaments si davuelzaran des 10.00 aes 16.00.
La nestre vite e je fate di relazions! Bielonis… ma cualchi volte nus somee di no savê cemût fâ. “Io, noi & gli altri”, un laboratori indreçât ai fantats e aes fantatis dai 14 ai 16 agns par confrontâsi e cjatâ cualchi strategjie buine par stâ miôr cun chei altris.
L'amôr, in dutis lis sôs sfumaduris, come un mont plen di aspiets diferents dulà scuvierzi prin di dut la proprie identitât: al è chest il fîl condutôr di “Love&Emotions”, il laboratori indreçât ai fantats e aes fantatis dai 17 ai 19 agns. Par informazions e iscrizions dentri dai 3 di Avost si pues contatâ Giulia Sillani, psicolighe di comunitât de Cooperative Itaca (tel. 3357772983) che e tignarà i incuintris adun cun Gaia Pecile, educadore dal S.S.C. Cjargne (tel. 3351266621). I apontaments si davuelzaran ai 29 e ai 31 di Avost e ai 5 e ai 8 di Setembar des 11 aes 13 par chei plui zovins e des 14 aes 16 par chei plui madûrs.
I laboratoris a fasin part de cuinte edizion di “Mettiamoci a Fuoco”, la progjetualitât estive indreçade ai preadolessents e ai adolessents de Cjargne fate in colaborazion cun artiscj e artesans locâi, che a metin a disposizion la passion pe lôr forme artistiche là che a viodin un lengaç privilegjât par ufrî ai partecipants la pussibilitât di cognossi e cognossisi, relazionantsi cui coetanis e cui stes adults che a condusin lis ativitâts.
I cinc laboratoris a son dedicâts di pueste a un public di adolessents e a vuelin jessi un spazi di scolte, di ricercje creative, di libertât espressive pai fantats e lis fantatis che a sielzaran di partecipâ. La forme artistiche e la condivision in grup a rapresentin la carateristiche distintive dai 5 percors, intune dimension di sperimentazion e lizerece.
Ducj i laboratoris a son gratuits: lis adesions a vignaran acetadis par ordin che a rivin fin che no si rivarà al numar massim di puescj fissâts par ogni laboratori.