"O invecji ben e o resti a For": incuintris formatîfs vierts al public organizâts dal Servizi Sociâl dai Comuns de Cjargne

Si puedial invecjâ ben, restant plui che si pues a cjase?
O scomenci a vê une cierte etât: cemût puedio jessi judât?
O soi daûr a viodi dai miei familiârs anzians cun demence: a cui puedio indreçâmi par un confront su lis mês dificoltâts e su lis soluzions pussibilis?

I operadôrs dal Servizi sociâl dai Comuns dal Ambit teritoriâl de Cjargne – Aziende Sanitarie Universitarie Friûl di Mieç e de Cooperative Sociâl Itaca si proponin di rispuindi a chestis e a altris domandis, inte schirie di incuintris programâts intai Comuns di For Disore e For Disot intal mês di Fevrâr dal 2023, cul titul: “O INVECJI BEN E O RESTI A FOR: incuintris informatîfs vierts al public”.

In gracie de colaborazion cu lis dôs Aministrazions comunâls, i professioniscj che a lavorin intal ambit dai servizis pai anzians dal Servizi sociâl dai Comuns a vuelin fevelâ cu la popolazion sul teme dal invecjament e dai servizis socioassistenziâi che si puedin proponi aes personis anzianis e ai familiârs che ogni dì a viodin di lôr.

Il percors al previôt:

• un incuintri iniziâl cul titul “A cui mi indrecio? I Servizis teritoriâi” là che e je previodude la presentazion dai servizis socioassistenziâi atîfs tal teritori. Si fasarà martars ai 7 di Fevrâr dal 2023 des 17.00 aes 18.30 li dal Centri di Comunitât e agregazion di For Disore (vie Madonna della Salute n. 22).
• un secont incuintri cul titul “Sfidis cuotidianis dentri e fûr di cjase”. E je la ocasion par vê sugjeriments pratics su la gjestion li dal domicili des personis cun dificoltâts motoriis, sensoriâls o cognitivis. Chest si fasarà li dal Centri Diurni Anzians “Mara Nassivera”, a For Disot (vie Baselia, 93) inte zornade di martars ai 14 di Fevrâr dal 2023 des 17.00 aes 18.30.

E un ultin incuintri cul titul “SOSteniAMOci” (Sostignìnsi): lis relazions in famee”, indreçât a facilitâ une riflession su cemût che a cambiin dutis lis relazions familiârs inte Tierce Etât. L'apontament al sarà martars ai 21 di Fevrâr dal 2023 des 17.00 aes 18.30 li dal Centri di Comunitât e agregazion di For Disore (vie Madonna della Salute n. 22).

In dutis trê lis ocasions, pes personis che no rivin a lâ fin li de sede dal incuintri, al è garantît il traspuart de bande de Aministrazion comunâl sedi di For Disot che di For Disore.

La partecipazion ai incuintris e je gratuite e ae fin des presentazions al è previodût un moment conviviâl ancje par tornâ a scuvierzi il plasê di stâ insiemi in serenitât e in compagnie dopo di chescj agns dificii.

Par vê plui informazions o par prenotâ il traspuart si à di contatâ l'Ufici Anagrafe dal Comun di residence: pal Comun di For Disot 0433 87025 (siore Barbara) e pal Comun di For Disore 0433 88056 (siore Elisa).

Paola Dario, responsabile dal Servizi Sociâl dai Comuns de Cjargne e spieghe: “In colaborazion cu lis aministrazions comunâls, che o ringracii pe oportunitât e pe disponibilitât, o proponìn trê incuintris su temis impuartants, inte sperance che cheste iniziative e puedi jessi buine pe popolazion e jessi une semence che e puedi gjenerâ iniziativis significativis pal benstâ des personis e de comunitât”.