Incuintris gratuits su la alimentazion complementâr dal frut e su lis azions par intervignî in câs di scjafoiament causât dal mangjâ

Tal mês di Otubar dal 2024 si è inviât un progjet nassût de sinergjie tra l’ospedâl e il teritori de aree materne infantîl de Basse Furlane pe formazion su la alimentazion complementâr dal frut (o sedi, il dislatament) e su lis manovris di fâ in câs di scjafoiament causât dal mangjâ.

La iniziative e je partide di une riflession des ostetrichis dal teritori che si cjapin cure di grups di neomamis residentis intal teritori, li de SOS Minori e Famiglia di Tisane e di Palme, che e fâs ancje di consultori: cussì, a son stâts ativâts cors mensîi teorics e pratics tignûts de pediatre dal Ospedâl di Tisane.

La dotore Sara Rosati e je la referente dal progjet che, partint des tematichis de alimentazion complementâr in etât pediatriche, o sedi de introduzion des primis mangjativis diviersis dal lat, e fronte il teme impuartant de prevenzion dai episodis di scjafoiament o inalazion di mangjative e su cemût intervignî in câs di incidents.

Duncje, si mostre ce manovris fâ in câs di scjafoiament ancje judantsi cul filmât publicât intal canâl YouTube de ASUFC (visibil chi) su lis manovris par liberâ lis viis respiratoriis di un cuarp estrani, video realizât de Pediatrie dal Presidi Ospedalîr Tisane- Palme; po dopo, lis neomamis e i neogjenitôrs a podaran fâ pratiche cuntun manichin.

Chescj incuintris pes neomamis e pai neogjenitôrs, dal dut gratuits, a rapresentin une buine ocasion par esercitâsi e imparâ lis manovris che a son di fâ e par rispuindi a cualsisedi dubi sul dislatament e la alimentazion complementâr.

Daûr dai dâts dal ISTAT, intal 27% des muarts acidentâls dai frutins tra 0 e 4 agns, la cause principâl e je il scjafoiament par vie che il mangjâ o altris cuarps estranis a sierin lis viis respiratoriis. Il moment li che si tache a introdusi robe di mangjâ solide inte alimentazion dal frutin al rapresente une fase delicade: chescj incidents a puedin capitâ, ancje par vie che i dincj no si son ancjemò fats dal dut e che il frutin nol è ancjemò bon di coordenâ il mastiâ e il gloti.

Al è duncje impuartant prime di dut cirî di prevignî chescj episodis preparant la mangjative juste pe etât dal frut, che e à di jessi adate ancje te consistence, cun tocuts avonde piçui e evitant chei aliments che al podarès inalâ intes viis respiratoriis.

In ogni câs, stant che nol è simpri pussibil prevignî il scjafoiament, al è impuartant savê intervignî in maniere corete e par timp cun manovris salvevite par liberâ lis viis respiratoriis dal frut, azions che i gjenitôrs e cui che al viôt dal frutin a puedin imparâ cun facilitât.

Il progjet, coordenât des ostetrichis Stefania Andrian, Anna Michelutti e Michela Pizzin, te SOS Minori e Famiglia di Tisane e Palme, al fâs part des iniziativis pe promozion de salût mame-frut dal teritori.

Par notâsi e par vê informazions su datis, lûcs e oraris, si pues telefonâ al numar 0432921820 (Sede di Palme) e 0431529366 (Sede di Tisane) il martars, il miercus e la joibe di matine des 9 aes 12. Si pues in dut câs lassâ un messaç te segretarie par che il personâl al puedi tornâ a clamâ prime pussibil.

Il progjet, che lis mamis dal teritori de Basse Furlane a àn za calcolât une vore interessant, al è il risultât di un bon lavôr di colaborazion e integrazion tra ospedâl e teritori, tra la Pediatrie dal Presidi Ospedalîr di Tisane-Palme, direte de dotore Elisabetta Miorin, e la SOS Minori e Famiglia de Basse Furlane, direte de dotore Barbara Pittino.