"Insiemi in biblioteche... tra cjacaris e storiis"

A Vençon, te Biblioteche comunâl e tal Palaç Orgnani Martina, tra Setembar e Novembar al sarà atîf un spazi dedicât a fruts e gjenitôrs.

In program a son cuatri incuintris: vinars ai 25 di Setembar e vinars ai 23 di Otubar des 17.00 aes 18.00, miercus ai 7 di Otubar e miercus ai 4 di Novembar des 10.30 aes 11.30.

I cuatri apontaments a saran pai fruts une ocasion par scoltâ storiis, scuvierzi libris, zuiâ e lassâ libare la creativitât tai spazis de Biblioteche; pai gjenitôrs a saran un moment par cjatâsi, confrontâsi su curiositâts, dubis e domandis e condividi lis piçulis e grandis fadiis di ogni dì te sale riunions di Palaç Orgnani Martina, che e sarà organizade in maniere di dâ acet ancje ai fruts plui piçui, che a volaran restâ cui gjenitôrs, intant che i fradis plui grants si dedicaran aes leturis e a chês altris ativitâts.

Ai incuintris a parteciparan sedi i operadôrs de Biblioteche, dal Servizi Sociâl dai Comuns e de Cooperative Aracon, sedi il Grup letoris volontariis di Vençon.

La iniziative e je promovude dal Comun di Vençon, de Biblioteche comunâl di Vençon, dal Servizi sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl (Aziende sanitarie universitarie dal Friûl Centrâl) e metude adun cu la colaborazion di Aracon Cooperativa Sociale Onlus, che e aderìs ae Associazion Temporanie di Imprese «Cooperative Itaca – Universiis – CODESS FVG – Aracon».