Ostetricie-Gjinecologjie di Udin: screade la sede gnove
vinars 9 di Dicembar dal 2022
![](/export/sites/asufc/it/immagini/inaugurazione_ost-gin_ud.jpg_1972794475.jpg)
"Cu la inaugurazion di vuê, si met in vore il progjet za tacât intai agns '80, pensât par vê un paveon dedicât al percors de salût des mamis e dai frutins. Al è un travuart impuartant pal fat che si è rivâts a obietîfs diviers e fondamentâi: la sigurece, cul moviment dal paveon 6 al 7; la funzionalitât, la eficience des ativitâts assistenziâls e la cualitât ambientâl cu la privacy, la comoditât e la umanizazion dai spazis dedicâts ae mame e al frut".
Chestis lis peraulis il vicepresident e assessôr cun deleghe ae Salût dal Friûl-Vignesie Julie, Riccardo Riccardi, fevelant ae scree de sede gnove de Struture operative complesse (Soc) Ostetricie e gjinecologjie, che si è davuelte intal paveon 7 "Tarcisio Petracco", dal presidi ospedalîr Sante Marie de Misericordie di Udin. A chest event a àn partecipât ancje il diretôr gjenerâl de Aziende sanitarie universitarie Friûl Centrâl, Denis Caporale, il retôr de Universitât dal Friûl, Roberto Pinton, e il sindic di Udin, Pietro Fontanini.
“I lavôrs, che a metin a disposizion des mamis e dai frutins plui spazi, a jerin tacâts tal Març dal 2019 e a son finîts tal Març passât, cuntun cost di cuasi 7,6 milions di euros, che la Regjon e à metût par cheste opare - al à ricuardât Riccardi -. E je stade fondamentâl la colaborazion strente cu la Universitât, come ancje la union intune aziende uniche di dôs ex aziendis e mieze: al è il risultât di une sielte coragjose fate par rispuindi al bisugn di salût de popolazion. I spazis gnûfs dal Dipartiment materni infantîl a rapresentin un percors virtuôs sierât tra hub e spoke".
La Soc Ostetricie-gjinecologjie e pues contâ su tancj professioniscj de salût: 20 miedis specializâts in ostetricie e gjinecologjie, 35 miedis che a son daûr a specializâsi in ostetricie e gjinecologjie, 47 ostetrichis, 29 infermieris e 21 personis di supuart. "A lôr ur disìn graciis di cûr pe passion e pe competence che a àn tal fâ il lôr lavôr" al à dit Riccardi.
La Soc e si spartìs intune struture di ostetricie cun 28 jets pes degjencis; un setôr travai pal part; une struture di gjinecologjie cun 28 jets pes degjencis; une aree ambulatoriâl cun ambulatoris pe assistence ostetriche gjinecologjiche e ambulatoris pal acès diret. E lavore simpri adun cu la Struture operative complesse di neonatologjie.
La ativitât de cliniche ostetriche e je organizade cun degjencis par assisti la gravidance patologjiche, lis latoanis e i neonâts. In plui, al è un setôr part par assisti i travais cuntun nivel di pericul alt, il travai cuntun pericul bas, e une sale operatorie pes urgjencis chirurgjichis ostetrichis.
Intal 2021, i parts totâi a son stâts 1465; di chescj, 354 cul cesari programât. Pe ativitât di chirurgjie, intal 2022 a son stâts fats 387 intervents di chirurgjie maiôr; di chescj, 211 par patologjie buine, 172 par patologjie oncologjiche; a son stadis 44 lis ativitâts fatis in ambit robotic; invezit, i intervents di chirurgjie minôr a son stâts 748.
Pes ativitâts ambulatoriâls, Ostetricie e furnìs cirche 16.000 prestazions par an (par consulence preconcezionâl; par gravidancis cun pericul ostetric bas, medi e alt; par ecografiis ostetrichis di secont nivel; par gravidance a tiermin e cardiotocografiche). Invezit, Gjinecologjie e furnìs cirche 14.500 prestazions par an (prericovars gjinecologjics, ativitâts gjenerâls di ambulatori, ambulatoris specialistics - oncologjic, urogjinecologjic, e v.i. - ecografiis gjinecologjichis di secont nivel, scandai dal cuel dal utar di secont nivel). Infin, a son cirche 4.000 lis prestazions fatis ogni an intal ambulatori cun acès diret.
Font Regjon F-VJ