Inaugurade la gnove Dialisi di Cividât: inovazion tecnologjiche, sostignibilitât e sanitât di prossimitât
Vuê, joibe ai 9 di Avrîl, al è stât inaugurât in vie uficiâl il gnûf Centri Dialisi di Cividât CAD (Centri a Assistence Decentrade) che al fâs part de SOC di Nefrologjie Dialisi e Traplant Renâl dal Ospedâl Sante Marie de Misericordie: la struture, che e je te sede dal distret, e rapresente un risultât fondamentâl par potenziâ i servizis sanitaris sul teritori e la cure dai pazients nefropatics.
Il gnûf centri si met in lûs pes sôs carateristichis tecnologjichis e organizativis ae avanvuardie. La aree cliniche e je dotade di 15 puescj tecnics (un in plui rispiet ae configurazion di prime) e 1 puest dedicât ae osservazion post-dialisi. La dotazion des machinis e je stade potenziade e cumò e à 20 aparecjaduris pe dialisi, supuartadis dal gnûf Implant AQUA B PLUS Fresenius e di un sisteme centralizât inovatîf pe distribuzion dal concentrât acit.
In chest moment il centri al à in cure 49 pazients emodializâts cronics, che a rapresentin il 30% dal totâl dai pazients dializâts in cure te SOC di Nefrologjie Dialisi e Traplant Renâldi Udin. La utence servide e je calcolade fragjile, cuntune etât medie di 76 agns e pazients che spes a son pluricomorbits (cun diabete e cardiopatiis), imunodeprès e cun necessitât di traspuarts organizâts.
La Struture si zove di un grup di 22 operadôrs dal personâl dal compart (infermîrs e personâl di supuart) e e je garantide la presince dal personâl medic de struture di Udin in ducj i turnis di cure, che a son organizâts in dôs fassis par zornade (matine e dopomisdì) dal lunis ae sabide. Tal 2025 lis dialisis a son stadis 7557 in totâl; in plui, la struture e previôt ancje un ambulatori nefrologjic che tal 2025 al à fat 293 primis visitis e 1.735 controi.
Il progjet dal Gnûf Paveon di Soreli Jevât, destinât a sede dal distret sanitari, al jere partît tal 2007 cuntun finanziament iniziâl di 7.150.000 euros, derivât di cuotis statâls e regjonâls. Il completament definitîf e la ativazion de dialisi che a son stâts pussibii dome di resint in graciis de ASU FC, cu la integrazion di 470.000 euros di fonts za disponibii e cuntune cuote in plui di 389.077 euros assegnade de Regjon Friûl-VJ.
La gnove Dialisi di Cividât no je dome un risultât clinic ecelent, ma e ufrìs ancje un contribût impuartant ae sostignibilitât di dut il sisteme sanitari de ASU FC e de regjon. Promovint il model de "Sanitât in Prossimitât", la gnove struture e garantìs la riduzion de mobilitât passive infraregjonâl, e preven lis ospedalizazions tal centri HUB di Udin, e contribuìs ae riduzion des listis di spiete e e promôf un un impuartant eficientament ecologjic.
Il diretôr gjenerâl de ASU FC, Denis Caporale: "Cheste inaugurazion e rapresente un moment impuartant no dome pe ASU FC, ma par dute la comunitât: puartâ un servizi ae avanvuardie tecnologjiche dongje dai citadins al vûl dî garantî a ducj curis plui siguris e eficientis pai nestris pazients plui fragjii, ridusint i discomuts plui pençs peâts ai traspuarts sanitaris continuis. E je duncje une tessare fondamentâl pe sostignibilitât di dut il sisteme sanitari regjonâl".