Il Centri di Salût Mentâl di Udin al scree une gnove struture residenziâl dedicade ai fantats tra i 18 e i 25 agns cu la colaborazion dal Comun di Udin
vinars 29 di Dicembar dal 2023
Une struture residenziâl par dâ acet tal lôr percors terapeutic a fantats tra i 18 e i 25 agns cun problematichis psicopatologjichis. E je stade screade in vie uficiâl tai dîs passâts la gnove struture de Aziende Sanitarie Friûl Centrâl in vie Bariglaria, a Udin, intune antighe cjase coloniche ricualificade.
La struture, che e dipent in maniere direte dal Dipartiment di Salût Mentâl cun a cjâf Marco Bertoli, e darà cussì acet a fantats che a cjapin part a un program riabilitatîf terapeutic, in vore dal 2002, che prime al jere logât in altris spazis.
La gnove cjase, che e pues dâ acet fint a 8 personis, che a son za dentri, e coventarà par ufrî un percors personalizât a cualchidun dai zovins che ur sta daûr il Dipartiment, che in graciis dal lavôr di miedis e di educadôrs, a podaran tocjâ impuartants obietîfs di vite, personâi e sociâi. Dal rivâ a un diplome ae frecuentazion di percors che a puartin a une profession, fin ae jentrade definitive tal tiessût sociâl dal teritori e al cirî un lavôr.
Ai fantats ur stan daûr, di là che i miedis dal Dipartiment, ancje un grup di educadôrs di une cooperative che a ufrissin il lôr supuart 24 oris su 24.
La dotoresse Alice Catalan, responsabile des residencis dal Dipartiment, e sclarìs: “La struture residenziâl e rispuint no dome aes necessitâts dal ospitâ, ma e ufrìs un supuart par aspiets esternis ae semplice residenzialitât. Il progjet al previôt par ognidun un percors cun obietîfs di tocjâ intun timp plui o mancul curt, stant che si va daûr de lôr cualitât”.
“O vin viert cheste comunitât li che i fantats che a patissin di cualchi disasi a podin passâ la gnot. Dispès a son fantatis e fantats che no van fûr di cjase, che no van plui a scuele, che a interompin i rapuarts sociâi”, al dîs il Diretôr dal Dipartiment Marco Bertoli. “Cemût che si pues capî, lis fameis a son in gruesse dificoltât tal gjestîju e il lôr numar al cres in maniere esponenziâl. L’obietîf al è chel di ufrî une oportunitât di socializazion par tornâ a meti in vore abilitâts sociâls che a permetin a chescj zovins di tornâ a tacâ lis normâls ativitâts. L’obietîf al è chel di dâ di gnûf vite a capacitâts e risorsis individuâls par jessî fûr tal mont une altre volte”.
Tal distret soci sanitari di Udin a son cirche 1.500 personis che ur si sta daûr, di chescj i zovins fin a 25 agns a son 225. E je une cressite di domande di cure tra i zovins, in particolâr par problemis di ansie, disturps di compuartament alimentâr e disturps dal compuartament in gjenar.
“O sin contents di furnî dut il supuart pussibil par integrâ plui che si pues chescj fantats tes ativitâts dal teritori udinês, in mût particolâr cu lis associazions che a lavorin in ambits diviers. Il Comun di Udin al è dongje de Aziende Sanitarie par dâ dut il jutori pussibil e par inviâ lis sinergjiis justis in viste dal gnûf inseriment in societât dai zovins che ur sta daûr il Centri di Salût Mentâl”.