Istituît il grup aziendâl pe imunotossicitât (GAIT) li dal Dipartiment aziendâl di Aree oncologjiche
miercus 4 di Otubar dal 2023
La imunoterapie e je daûr a cambiâ la cure cuintri dal cancar e a miorâ lis prospetivis di cure pai pazients. Cun cualchi studi si à calcolât che cirche 1 pazient su 5 al podarès vê beneficis cun cheste gnove classe di farmacs intune fase avanzade de malatie. Cun di plui, par cualchi tumôr e par fasis precocis de malatie, plui de metât dai pazients a puedin vê rispuestis buinis e che a durin ae imunoterapie ancje in graciis de cumbinazion cun altris farmacs pai tumôrs.
I vantaçs plui grancj a son stâts regjistrâts intal melanome, intai tumôrs dal polmon, dal rognon e in cualchi tumôr dal trat gastrointestinâl. Intal Presidi Ospedalîr Sante Marie de Misericordie di Udin intal 2022 passe 300 pazients a àn vût un tratament cun imunoterapie.
Si ben che cheste cure e sedi in gjenar mancul tossiche a pet de chemioterapie tradizionâl, e je une cuote di 10-15% dai pazients che e disvilupe efiets colaterâi une vore particolârs e ancje une vore fuarts. I efiets colaterâi si puedin identificâ e gjestî in maniere corete dome se e je une incarghe inte sede di cure di bande di un grup di specialiscj che a àn l’obietîf di miorâ la gjestion in cont di diagnosi e cure di chescj pazients midiant di percors condividûts e planificâts.
Daspò di agns di sperimentazion, tacâts dopo di une esperience francese de “Società Europea di Oncologia medica”, la Aziende sanitarie universitarie dal Friûl centrâl e à istituît in maniere formâl il Grup Aziendâl pe Imunotossicitât, che al à inmaneât i siei lavôrs ai 25 di Mai stâts.
La iniziative, coordenade dal Dipartiment Aziendâl de Aree oncologjiche, diret di Gianpiero Fasola, e cjape dentri dutis lis struturis di Oncologjie e di Prin Socors Aziendâl (Tumieç-San Denêl, Tisane-Palme e Udin), lis Direzions medichis ospedalieris, la Direzion sanitarie e un grup grant di specialiscj di putropis dissiplinis.
L’intindiment al è sigurâ ai pazients in tratament li dal Dipartiment aziendâl di aree oncologjiche de Aziende di jessi seguîts in maniere adeguade e di jessi un riferiment pront al specialist espert inte gjestion des tantis e complessis manifestazions clinichis di cheste tossicitât, cence tignî cont de residence dal pazient e de sede dal prin acès.
Al è stât scrit un manuâl aziendâl che al presente in struc ducj i obietîfs e lis proceduris di meti in vore. Il grup al è coordenât de dotore Donatella Iacono cu la colaborazion de dotore Marianna Macerelli e Marika Cinausero dal Dipartiment di Oncologjie e cul supuart di une progjet manager, dentri de Direzion Sanitarie.
Il grup GAIT si è dât dongje miercus ai 20 di Setembar e a son previodudis altris iniziativis di formazion e di educazion che a cjapin dentri, no dome i miedis di Prin socors, ma ancje i miedis di medisine gjenerâl.
“La costituzion dal Grup Aziendâl pes Imunotossicitâts (GAIT) – e dîs la dotore Iacono – e permetarà di avantazâ la difusion des cognossincis inte suaze dai efiets colaterâi dai farmacs imunoterapics ancje cjapant dentri i coleghis des areis di Emergjence e i Miedis di Medisine Gjenerâl, professioniscj di fonde pe cure di chescj pazients. Cun di plui, un sfuarç grant al sarà pe condivision e pe colaborazion cui specialiscj che inte Aziende si dedichin a miorâ il percors assistenziâl e di cure dai nestris pazients cirint proceduris e imprescj adats.”