Zîr de Italie: ASUFC e aumente il plan sanitari pe tape Tarvis-Mont Lussari

In viste de tape aromai prossime dal Zîr de Italie che e previôt la cronoscjalade Tarvis-Mont Sante di Lussari, la ASUFC e à disponût un potenziament dal plan sanitari. Chest in considerazion dal fat che la seconde part dal percors de tape e passe par un ambient di mont boschîf cun dificoltât di moviment di oms e mieçs, e timps di intervent/socors che a puedin jessi condizionâts dal fat di intervignî intun teren dificil.

Par chest si è disponude une integrazion cun chestis risorsis a pro dai spetatôrs e dai residents:

1) Elisocors, li de aree che e je te jessude autostradâl di Ugovize, cun ecuipaç operatîf des 8.00 aes 20.00; cuant che il mieç nol è operatîf, l'ecuipaç sanitari al colabore cul PMA (Puest Medic Avanzât) che al è li dongje.

2) Ambulance ALS (Advanced Life Support) disponibile te stazion di partence de cabinovie dal Lussari fin aes 11.00, e trasferiment sucessîf tal centri abitât di Valbrune fin aes 20.00.

3) Ambulance ALS metude, des 12.00 aes 24.00, inte aree dongje de jessude autostradâl di Ugovize in prossimitât dal PMA atîf dentri dal autotren de Protezion Civîl.

4) Ambulance 4x4 presinte ten cime dal Lussari dongje de beorcje “gleseute troi dal pelegrin”, di cuant che e tache fin cuant che e finìs la manifestazion.

5) Un PMA cun miedi e infermîr ativât dentri dal autotren de Protezion Civîl F-VJ, dongje de eliplaçute di Ugovize, atîf des 12.00 aes 24.00 par assistence tes urgjencis classificadis tant che codiçs Blancs e Verts.

6) Doi mieçs Quad presints tal ultin toc dal percors, dotâts di DAE (Protezion Civîl) par cure di Promoturismo FVG (Aree di stazionament e partence zone acès “Tunnel”). Dilunc dal deflùs dai spetatôrs a gare finide, chescj mieçs, adun cu la ambulance 4X4, a podaran jessi spostâts a val o a mont, a seconde des dibisugnis.

7) Scuadris di socoridôrs CNSAS F-VJ cun portantinis KONG e lûs frontâls su la cime de tape.

8) Scuadris di volontaris de Protezion Civîl F-VJ cun DAE, metudis ogni 300 metris cirche intal trat finâl de tape, viert al public.

9) Un PMA dentri de Canoniche dal Santuari Mont Sante dal Lussari cun Personâl SORES e ASUFC pes manovris di prin socors e pe stabilizazion in câs di evacuazion. Dongje dal PMA si fasarà sù une sale operative condividude cun sistemis radio che a metin in comunicazion i Ents presints.

10) la evacuazion di eventuâls personis feridis de cime de Mont Sante dal Lussari si podarà fâ:

• cun cabinovie, ancje par pazients su la barele;
• cun Eliambulance cjariant dentri il ferît cuntune binte
• cu la ambulance ALS4x4 tes polsis de gare e a gare finide.

Cun di plui, il troi dal Pelegrin (strade che i escursioniscj a cognossin par lâ sù in Mont Lussari) al sarà presidiât di scuadris di volontaris de Protezion Civîl sedi tal moment de salide ae mont a buinore, sedi tal tornâ indaûr dopo finide la gare.

Presidis compagns a saran disponûts tal percors di gare cuant che i spetatôrs a vignaran jù de mont une volte finide la gare.

La presince de ambulance ALS di sisteme 118 di stanzie a Scluse e sarà sprolungjade fin aes 21.30; al reste invariât l'orari de ambulance ALS dongje dal Poliambulatori di Tarvis, presint par dutis lis 24 oris.

Infin, il Poliambulatori di Tarvis al vignarà potenziât cu la presince di un miedi, des 9.00 aes 19.00, e di un infermîr, in plui de presince dal miedi di continuitât assistenziâl intes fassis orariis che i son di competence.

Il Diretôr Gjenerâl, dotôr Denis Caporale: “O vin potenziât la rêt sanitarie par garantî il massim de sigurece par une manifestazion che e viodarà un aflùs impuartant di apassionâts, augurant che e sedi une grande zornade di sport e di fieste pal nestri teritori”.