Ai 14 di Març dal 2024: Zornade Mondiâl dal Rognon
miercus 13 di Març dal 2024
Lis iniziativis de Nefrologjie di Udin su la “Salute Renale per Tutti” ("Salût dal rognon par ducj").
Joibe ai 14 di Març e je la Zornade Mondiâl dal Rognon: la ASUFC e partecipe cu lis iniziativis de Struture di Nefrologjie e Dialisi di Udin, direte dal dotôr Giuliano Boscutti.
La FIR (Fondazione Italiana Rene), o sedi la Onlus che dal 2001 e promôf ogni an cheste zornade midiant di dutis lis struturis di nefrologjie talianis, e je ative par miorâ il dialic e la colaborazion tra dutis lis personis che ogni dì si impegnin par prevignî lis malatiis dal rognon e par difondi simpri di plui la cognossince de prevenzion, de diagnosi e de cure des malatiis dal rognon.
La dotore Alessandra Marega, specialiste de Struture dal Ospedâl di Udin e referente de FIR FVG: “La Zornade Mondiâl dal Rognon è ufrìs une oportunitât impuartante par interessâsi dai rognons, parts dal cuarp che no calcolìn plui di tant parcè che no si ju cognòs: a patissin cidins e si pandin malâts cuant che aromai al è masse tart".
I rognons no coventin dome par depurâ il sanc: di fat, a àn ancje une funzion endocrine produsint ormons (renine, eritropoietine, vitamine D); determinâts segnâi a visin che i rognons no funzion ben e i dams si ju pues viodi dome cun esams sempliçs.
Il teme des iniziativis al sarà la prevenzion primarie de malatie croniche (evitâ che il rognon si inmali) e secondarie (ralentâ la malatie cuant che si è inviade), parcè che e à un impat une vore impuartant te vite dal pazient, de sô famee e di dute la societât.
Dopo dal incuintri di Udin, une altre serade di informazion par dute la popolazion si fasarà a Cividât, joibe ai 14 di Març aes 18.00 te Biblioteche locâl (Plaçute Chiarottini, 4), dal titul “Salute renale per tutti” ("Salût dal rognon par ducj").
In plui, te stesse zornade, a buinore, al sarà disponibil un bancut di pueste tal ingrès principâl dal Ospedâl di Udin (Paveon 1), dulà che si podaran ricevi informazions su chest argoment de bande di nefrolics specialiscj.
“O sperìn che i citadins a partecipin in tancj a chestis iniziativis che o proponìn – e conclût la dotore Marega - e tant che specialiscj o restìn simpri a disposizion par cualsisei sclariment che un utent al domandi e, se al covente, par aprofondî miôr i dubis te Struture de Nefrologjie".
