Zornade Internazionâl cuintri dal Papilloma Virus

In ocasion de Zornade Internazionâl cuintri de infezion dal Papilloma Virus Uman (HPV), il Dipartiment di Prevenzion de ASUFC al propon lunis ai 4 di Març une zornade par vacinâsi cuintri dal HPV, a gratis e cun acès libar.

In Friûl-Vignesie Julie la vacine e je gratis pai zovins nassûts tal 2012, par chei plui grancj fin a 26 agns che no son ancjemò vacinâts e ancje pai adults che a son plui predisponûts a infezions o a tumôrs (delibare de Zonte Regjonâl numar 1549 dai 6 di Otubar dal 2023).

Lis vacinis dai 4 di Març a son pai zovins dai 11 agns (nassûts tal 2012) fin ai 26 agns che no son ancjemò vacinâts; la liste dai ambulatoris e dai oraris par vacinâsi e je ripuartade chi sot:

Tumieç, vie Morgagni, 20 - des 14.00 aes 15.00

Udin, vie Chiusaforte, 2 - des 14.00 aes 17.00

Codroip, viâl Duodo, 82 - des 14.00 aes 15.00

La infezion dal Papilloma Virus Uman (HPV) e je la plui difondude par vie sessuâl tra oms e feminis. Dispès la malatie e tache cence segnâi e in plui de metât dai câs e vuarìs bessole. In cualchi câs, però, la infezion e pues resisti fasint vignî fûr tumôrs bogns te piel e tes mucosis, e cualchi volte ancje cancars.

Di fat, i tumôrs anâi, vagjinâi e dal cuel dal utar, a son cuasi simpri colpe dal HPV, e ancje buine part di chei dal penis e de vulve.

Vuê si pues prevignî la infezion dal HPV, e duncje ancje i tumôrs provocâts dal virus, midiant de vacine: cheste e à plui fuarce se si le fâs prime di infetâsi, par chest si insist tant par che si vacinin i fantaçuts.

La vacine e je ben tolerade: se si vessin di vê efiets colaterâi, a son lizêrs e a durin pôc. La punture si le fâs tal muscul dal braç, dongje de spale, par chest dopo si podarès vê li un tic di fastidi.

Al è impuartant ricuardâ che se si vacinisi sot dai 15 agns, a bastin 2 iniezions par jessi protets, se di no si à di fâ ancje la tierce.

Duncje, gjavâsi vie chest pinsîr al conven dôs voltis!