9 di Març dal 2023: Zornade Mondiâl dal rognon
lunis 6 di Març dal 2023
Il sprolungjâsi de sperance di vite, adun cul miorament intal timp de sô cualitât, al è ae fonde de incressite des malatiis renâls intal mont. E je pardabon une epidemie, che par vie che e tache di platât e che dispès no ven diagnosticade daurman, e pues puartâ intai agns ae insuficience renâl terminâl: cheste cundizion e domande il tratament sostitutîf e duncje il traplant di orghin o la dialisi tant che terapiis salvevite.
La “Fondazione Italiana Rene” (FIR) e je une onlus che ogni an, pe zornade Mondiâl dal Rognon, e vûl sensibilizâ la popolazion gjenerâl sul pericul di no tignî cont di cierts sintoms che a puedin jessi leâts a une malatie renâl.
La atenzion si concentre in particolâr su la impuartance di controlâ la pression arteriose e la glicemie, di vê une diete ecuilibrade, di cjoli farmacs dome se in efiets al covente, di no fumâ: dutis chestis azions a puedin evitâ di fâi dam al rognon.
Chest an, la Zornade dal rognon e je dedicade di pueste a “Preparâsi ai events inspietâts, judant i pazients fragjii”: un teme solecitât di dutis chês circostancis inspietadis e dolorosis (pandemiis, montanis, vueris, taramots), che al pâr che si sedin dadis apontament par tornâ a ocupâ il lôr puest tai agns che o sin daûr a vivi.
Chestis circostancis, di fat, a funzionin tant che catalizadôrs che a metin in lûs lis fragjilitâts e lis trasformin in emergjencis dramatichis: i pazients nefropatics, traplantâts e dializâts a son esponûts in maniere particolâr a chescj events.
“L'obietîf de FIR F-VJ al è chel di sensibilizâ lis personis su la prevenzion primarie midiant di un stîl di vite coret e di une incressite de ativitât fisiche aerobiche, ancje dome par 30 minûts ogni dì – nus dîs la dotoresse Alessandra Marega, nefrolighe dal Ospedâl di Udin e referente dal F-VJ pe FIR-. E di fâ esams sempliçs, par esempli la creatinine plasmatiche e l'esam des urinis tant che screening e po la visite dal miedi di medisine gjenerâl che al valutarà se indreçâsi o no al Nefrolic specialist par escludi complicazions a nivel renâl.”
Si pues contatâ la FIR tal sît https://www.fondazioneitalianadelrene.org par vê altris sclariments su lis iniziativis in vore pal 2023.