I Servizis des Dipendencis di ASUFC a partecipin ae Zornade Mondiâl dal Zûc 2025

Il Servizi des Dipendencis Friûl de Alte al aderìs al progjet de Associazion di Promozion Sociâl "FareTra" che si davuelzarà tai dîs 23 e 24 di Mai dal 2025, in concomitance cu la Zornade Mondiâl dal Zûc 2025 promovude dal Comun di Udin, che si disviluparà in chestis ativitâts.

Vinars ai 23 di Mai, aes 18.00 te Librarie Editore Odòs in vicul de Bancje 6 a Udin, la APS "FareTra" e à inmaneât un incuintri dal titul "Zuiâ o no zuiâ? Zûc e Tecnologjie: cognossiju e capîju cuintri des Dipendencis".

Relatôrs al event a saran:

• Fulvio Romanin, CEO di Ensoul, une web developement agency cun sede a Udin (Ensoul, web developement agency), titul dal intervent "Realtât aumentade, Metaviers, IA e altris animâi fantastics";
• Alan Mattiassi, Psicolic dal Zûc (Alan Mattiassi - Alan D.A. Mattiassi, PhD) titul dal intervent "Lis esperiencis in linie: indentitâts, monts e relazions. Gaming nol vûl dî gamification";
• Marco Toppano, UX Designer (Marco Toppano - Design Manager - MeDirect Bank Malta | Linkedin), titul dal intervent "Engagement: sino nô che o zuìn o isal cualchidun che al zuie cun nô?";
• Giorgio Jannis, Semiolic (Jannis | Abitiamo i linguaggi, i territori sono conversazioni.), al intervistarà e al aprofondirà insiemi cun altris esperts i aspiets sociâi e culturâi dal Zûc e dai monts Virtuâi.

Intun confront a plui vôs al sarà tratât il teme dal Zûc e de Tecnologjie informatiche cun particolâr atenzion al significât socioculturâl de Rêt, dal zûc online, dai Social e dai risis di abûs e disturps corelâts fintremai ae patologjie, cun focus sui mecanisims principâi fatôrs protetîfs e di risi, par evidenziâ che il Zûc di azart e chel online no son un probleme tant che at dal zuiâ, ma a son lis mecanichis dal azart responsabilis dai risis.

L'incuintri al è pensât par informâ la popolazion gjenerâl, cun particolâr atenzion pai professioniscj dal mont sociosanitari e de educazion formâl e informâl.

Sabide ai 24 di Mai dal 2025, tal contest des ativitâts inmaneadis dal Comun di Udin in ocasion de Zornade Mondiâl dal Zûc 2025, des 15 aes 19, li dai Zardins dal Tors in vie dal Sâl a Udin, a saran organizâts:

• un pont di zûc par cure de APS "FareTra", cun disponibilitât di zûc che a alenin lis capacitâts neuropsicologjichis di minôrs e adults;
• un pont di zûc par cure de APS "MisMàs", che e proponarà une ativitât cu lis jerbis aromatichis, cu la idee che la mangjative no si le mangje dome cu la bocje ma ancje cui voi, il nâs e lis orelis, par rifleti insiemi su ce che al vûl dî mangjâ san, net e just, su ce che e je la biodiversitât e su trop che e je impuartante par nô che o vivìn su chest planete insiemi cun altris specis viventis.

Te stesse location e tal stes orari, i Servizis pes Dipendencis di ASUFC (Areis Friûl de Alte, Friûl di Mieç e Basse Furlane) a colaboraran insiemi par meti adun l'INFOPOINT "IL ZÛC AL PROMÔF LA SALÛT", dulà che operadôrs di svariadis professionalitâts che a lavorin pai servizis a saran a disposizion de popolazion par presentâ lis ativitâts dai servizis stes e spiegâ fatôrs protetîfs e di risi des Dipendencis, cuntune atenzion particolâr pai campanei di alarme che a segnalin un pussibil risi alt pe salût di minôrs e adults.

Sabide ai 24 di Mai, aes 18.00, li dal INFOPOINT di ASUFC e sarà une discussion dal titul "Zuiâ o no zuiâ? Dialic cui esperts", dulà che a intervegnaran:

• Antonietta Benedetti, presidente di FareTra APS, titul dal intervent "Isal necessari fevelâ di Zûc e Tecnologjie? Une analis de realtât sociâl dal teritori, cun particolâr riferiment ai minôrs di etât prescolâr e primarie";
• Teo Petruz, espert in Media Education de APS MEC (Media Educazion Comunitât), titul dal intervent "Soio ce che o somei? Compuartaments a risi dai adolessents che a doprin la rêt in F-VJ: une analisi e azions pussibilis":
• Andrea Mian, Psicolic Psicoterapeute, titul dal intervent "Cuant che l'azart al devente un probleme ce si aial di fâ? L'ambulatori DGA dipendencis comportamentâls e tecnologjichis e i servizis furnîts dai SerD".

Moderadôr dal incuintri al sarà Antonio Morittu, Educadôr Professionâl di dal SerD Friûl de Alte di ASUFC.

L'incuintri al è pensât par informâ la popolazion, cun particolâr atenzion ai gjenitôrs di minôrs e adolessents e aes fameis di personis a risi di Disturp di Zûc di Azart, su campanei di alarme e fatôrs protetîfs e di risi di abûs di mieçs e aplicazions tecnologjichis (smartphone, social, gaming online) in mût di promovi un lôr ûs cussient.