Zornade Internazionâl des Malatiis Raris: ai 24 di Fevrâr une zornade di confront e di events tal Centri Balducci

Sabide ai 24 di Fevrâr, tra lis manifestazions par celebrâ la Zornade Internazionâl des Malatiis Raris (ai 29 di Fevrâr dal 2024), e sarà inmaneade une schirie di events tal Centro di Accoglienza "Ernesto Balducci" di Çuian par sensibilizâ la int sul argoment des malatiis raris.

A buinore, dopo dai salûts istituzionâi, a fevelaran i relatôrs, in particolâr i specialiscj dal Centri di Coordenament Malatiis Raris de ASUFC, diret dal professôr Maurizio Scarpa. I temis principâi a saran la diagnosi e la assistence dai malâts di patologjiis raris e lis ultimis novitâts sul gnûf Plan Nazionâl Malatiis Raris, su cemût metilu in pratiche midiant de gnove Rêt Regjonâl pes malatiis Raris aprovade ai 13 di Fevrâr.

Simpri a buinore a fevelaran ancje lis Associazions dai pazients, che par chest cont, lavorant cu lis istituzions, a son ents fondamentâi: a daran la lôr testemoneance contant lis lôr esperiencis fatis in regjon e a nivel nazionâl.

Tal dopomisdì, invezit, si fasaran ativitâts artistichis: a saran protagoniscj la fotografie, il sport, la musiche, la poesie e fintremai un interessant aperitîf cidin, par cualchi ore di plen spetacul e divertiment.

Il professôr Maurizio Scarpa, diretôr dal Centri di Coordenament Malatiis Raris de ASUFC, al à declarât: "Ogni an la zornade internazionâl des malatiis raris e je une ocasion par fermâsi a pensâ a chestis patologjiis: la zornade, inmaneade dal Centri Balducci, e met adun professioniscj sanitaris, ents territoriâi e dut ce che al à a ce fâ cu lis malatiis raris, par condividi esperiencis e soluzions gnovis. E sarà une zornade di fieste, o sperìn che e vegni tante int ancje par cognossi miôr chescj argoments".