Ai 12 di Fevrâr la Zornade Internazionâl de Epilessie

Lunis ai 12 di Fevrâr e je la Zornade Internazionâl de Epilessie che e vûl informâ e sensibilizâ la int su la epilessie e sui problemis clinics, di gjestion e sociâi che cheste e compuarte.

La citât di Udin si è simpri interessade di chest argoment e ancje chest an dut Marcjât Vieri si iluminarà di viole, che al è il colôr dedicât ae Epilessie, ai 10, 11 e 12 di Fevrâr.

Cun di plui, ai 15 di Fevrâr al è in program l’event intitulât “Match point, Epilepsy!”, fat cu la colaborazion dai Neurolics e dai Neuropediatris de ASUFC, e cu lis associazions “Epilessia FVG o.d.v.”, “Zio Pino Baskin” e “Sportinclusion FVG”. Dopo di une session informative su “Sport ed Epilessia” si fasarà une dimostrazion di baskin, un sport di scuadre inclusîf che al ven dal basket.

Considerant il benefici terapeutic e educatîf che a dan lis dissiplinis sportivis, il teme principâl dal International Epilepsy Day di Udin dal 2024 al è il sport in gjenerâl e, plui in detai, il baskin.

Di fat, il sport al è fondamentâl par vê une vite sane e pe medisine preventive; al jude a vê dissipline, a socializâ, a impegnâsi par rivâ a un risultât, e al aumente la sigurece di se stes.

Tal baskin, personis cun abilitâts diferentis a zuin cun altris che no àn disabilitâts, butant jù lis barieris che a son dispès ideologjichis, e scambiantsi esperiencis in maniere costante.

La epilessie e je la malatie neurologjiche croniche plui frecuente: e pues tacâ a dutis lis etâts e si à di curâle par plui agns, ancje par dute la vite.

Ancje se lis societâts sientifichis e lis associazions dai pazients a àn fat tant fin cumò, cheste malatie vuê e je ancjemò pôc cognossude fûr dal setôr sanitari in relazion aes sôs carateristichis o a cemût gjestîle te vite di ogni dì. Par chest a durin ancjemò i prejudizis, e ancje lis dificoltâts che cualchi volte i malâts a àn te lôr vite di ogni dì, a scuele, tal lavôr, tal sport e tal timp libar.