Ai 13 di Fevrâr dal 2023: zornade internazionâl de epilessie

Te ocasion de zornade internazionâl de epilessie, lis struturis de Neurologjie e de Cliniche Neurologjiche dal Ospedâl di Udin a organizin lunis ai 13 di Fevrâr aes 15:30 un event par informâ e sensibilizâ la popolazion su la epilessie, lis problematichis clinichis, gjestionâls e sociâls che cheste e compuarte.

L’incuintri si fasarà li di palaç d’Aronco a Udin.

La epilessie e je la seconde malatie neurologjiche croniche plui frecuente, e pues presentâsi a cualsisedi etât e e domande trataments par plui agns, se no par dute la vite di une persone.

Ancjemò vuê, cundut che tancj sfuarçs a sedin stâts fats de bande des Societâts Sientifichis e des Associazions di pazients, lis carateristichis di cheste patologjie e la sô gjestion inte vite cuotidiane a son ancjemò pôc cognossudis difûr dal setôr sanitari e chest al contribuìs ae indurance di prejudizis e aes dificoltâts che, cualchi volte, i pazients a cjatin inte vite cuotidiane, a scuele, sul lavôr, intal sport, fintremai intal timp libar.

Ve parcè che la zornade internazionâl e je impuartante: e covente par centrâ la atenzion, par lassâ un segn, une testemoneance fuarte une volte ad an, inte sperance che une edizion daûr chê altre la popolazion e vegni educade sul teme.

La citât di Udin si è dimostrade simpri ricetive su chest, iluminant di viole (il colôr de Epilessie) par cualchi dì un monument de citât o dute vie Marcjât Vieri e ospitant events vierts ae citadinance fats dai neurolics specialiscj e dai neuropediatris dal Ospedâl di Udin, cun fins informatîfs e didatics.

Dal 2016 fin in dì di vuê a son stâts fats incuintris sientifics informatîfs dulà che la art e vignive doprade tant che mieç espressîf e fîl condutôr di un dialic su la Epilessie.

De musiche ae danze, de leterature ae fotografie, ogni an e je stade sielte une art diferente, buine di “comovi” intal sens primigjeni dal tiermin, ven a stâi scjassâ, disveâ un sens di partecipazion emotive comune.

Tal stes timp, la art sielte di un an in chel altri e permeteve di frontâ un aspiet diferent de Epilessie, patologjie complesse e cun tantis musis, e di esplorâ aspiets diagnostics particolârs o gnovis impostazions terapeutichis.

Pal 2023, e je stade sielte la art culinarie.

Lis motivazions a son cetantis: prin di dut, la nestre Regjon e je simpri pronte te atenzion al teritori e te tutele dai prodots e des tradizions locâls, unidis ae capacitât di inovazion e ae creativitât che a permetin un rinovament costant e une reinterpretazion di ricetis antighis.

Cun di plui, dal pont di viste medic, la diete e je simpri plui une terapie di associâ ai farmacs pal miôr control des crisis, pe riduzion dai efiets colaterâi e pal benstâ globâl dal individui.

Dilunc dal event proponût, a vignaran presentadis dietis che a son in dut e par dut terapiis e tipologjiis di epilessie che la lôr patogjenesi e je leade a strent a cualchi aliment, tant che intal câs de celiachie, o ae lôr mancjance (par esempli lis epilessiis carenciâls).

Si podarà scuvierzi cemût che une diete adate e puedi potenziâ l'efiet di une terapie farmacologjiche e cemût che, cualchi volte, l'at dal mangjâ al judi il nassi di crisis, in chês che ur disin formis rifletudis.

Al sarà un moment di scuvierte e di condivision, vuidâts dal gust e de cussience che, ancje se in etis di alte tecnologjie e di terapiis inzenirizadis, la salût e nas ancje e soredut di abitudins cuotidianis, di piçulis atenzions, de cussience di ce che o puartìn su la nestre taule e de riscuvierte dal mangjâ san che, a diference di ce che si crôt, al è ancje saurît.