Zûcs di taule: in Març, cuatri incuintris te biblioteche di Tumieç
joibe 2 di Març dal 2023
Iniziative poiade dal Servizi Sociâl dai Comuns de Cjargne
La Biblioteche civiche “Adriana Pittoni” di Tumieç tal Dicembar dal 2022 e à promovût incuintris par fantats e fantatis dai 11 agns insù finalizâts a cognossi lis potenzialitâts dai zûcs di taule. La propueste, fate ae Biblioteche di un zovin di Tumieç, cognossidôr apassionât e zuiadôr di board games, e à vût la poie dal Servizi sociâl dai Comuns dal ambit teritoriâl Cjargne – ASU FC e de Cooperativa Itaca: chescj ents a son impegnâts za di agns a proponi percors di formazion sui zûcs di taule intal ambit educatîf e a àn za colaborât plui voltis cu la Biblioteche, par rindi simpri plui vive e svariade la fruizion de Biblioteche stesse. La partecipazion ai incuintris e je stade buine e e à permetût di meti in evidence l’interès par chest gjenar di ativitât intal teritori.
Cheste esperience e à dât la oportunitât di cognossi une altre realtât che sul teritori cjargnel e propon e e dopre il zûc di taule in ambit educatîf: l’ I.S.I.S. Fermo Solari di Tumieç, che tal Istitût al à metût a disposizion une ludoteche interne, là che docents apassionâts di board games a promovin la formazion al zûc di taule pai students, fasint ancje cognossi la figure dal ludotecari, preziose in ducj i contescj educatîfs e didatics.
Cheste cognossince e je nassude ator des situazions di zûc, de condivision de impuartance dai board games e dal zûc in gjenerâl tant che strument educatîf, flessibil, creatîf, interatîf; i zûcs di taule a son bogns par plui aspiets, par esempli: pes capacitâts relazionâls, pe autoregolazion emotive, cognitive - potenziant la atenzion, la memorie, la capacitât di fâ plans, di inibî la rispueste e di vê flessibilitât mentâl -, e creative; chest al vâl pai fruts e pai fantats, ma ancje par dute la popolazion, dilunc di dute la vite. Partint di chest, si è disvilupade la idee di une colaborazion che e à puartât a proponi la 2e edizion dal “Gruppo Giochi da tavolo”: cuatri incuintris te Biblioteche di Tumieç, par fantats e fantatis dai 11 agns insù, che si fasaran vinars ai 10, 17, 24, 31 di Març dal 2023, des 15.00 aes 17.00. Tant che condutôrs dai zûcs des diviersis taulis a saran i students dal I.S.I.S. Fermo Solari che a fasin cjâf al progjet leât ae ludoteche di Istitût.
Par notâsi (la iscrizion e je obligatorie par vie dai spazis e par garantî la miôr organizazion pussibile) si à di telefonâ in Biblioteche a chest numar 0433.487951 o scrivi a biblioteca@comune.tolmezzo.ud.it .
Dongje dai fantats, in plui dai docents che ur stan daûr intal percors de ludoteche, e sarà une educadore de Cooperativa Itaca, esperte di zûcs di taule, ative tes progjetualitâts de Aree di Disvilup di Comunitât dal Servizi sociâl dai Comuns de Cjargne.
Provâ a condusi i zûcs al ufrìs ai students dal I.S.I.S. Fermo Solari la pussibilitât di fâ esperience direte e di metisi ae prove intun rûl che al da grandis responsabilitâts e tal stes timp al promôf il disvilup de fiducie in se.
Pai fantats che si sentin ator des taulis tant che zuiadôrs, i dopomisdîs in Biblioteche a dan la ocasion di gjoldi il zûc dal vîf, cun dute la fuarce che a àn lis cjaladis che si scambiisi di une bande a chê altre de taule di zûc, lis ridadis, il plasê di vivi insiemi une passion o di scuvierzile, e dopo sielzi di coltivâle.