Grup "zûcs di taule": trê incuintris a Tumieç par fruts dai 11 agns insù

Fantats e fantatis dai 11 agns insù a podaran partecipâ a trê incuintris, vinars ai 22 di Març, miercus ai 27 di Març e miercus ai 3 di Avrîl, des 14,30 aes 16,30 te Biblioteche di Tumieç, metude a disposizion dal Comun di pueste par chest progjet: si fasaran zûcs diferents su plui taulis cu la vuide dai students dal I.S.I.S. Fermo Solari che a partecipin al progjet de ludoteche dal Istitût.

Si è za rivâts ae edizion numar 3 di chest apontament che dal Dicembar dal 2022 si fâs te Biblioteche civiche "Adriana Pittoni" di Tumieç. Un progjet par zovins preadolessents e adolessents, par che a cognossin e a provin lis potenzialitâts dai zûcs di taule. A cheste propueste al partecipe l' I.S.I.S. Fermo Solari di Tumieç che te sô scuele al à metût in vore une ludoteche: di fat, docents apassionâts di board games (“zûcs di taule”) a promovin la formazion al zûc di taule pai students, fasint ancje cognossi la figure dal ludotecari, preziose in ducj i contescj educatîfs e didatics. Al partecipe ancje Marco Andreoli, un apassionât zuiadôr di board games.

Al partecipe a cheste iniziative ancje il Servizi sociâl dai Comuns dal ambit teritoriâl de Cjargne - ASU FC, che al à inmaneât il progjet adun cu la Cooperativa Itaca. Za di cualchi an incà, chescj doi ents si son impegnâts a predisponi percors di formazion dai zûcs di taule in ambit educatîf e a àn ancje colaborât plui voltis cu la Biblioteche par fâle deventâ un lûc simpri plui vivarôs e interessant.

Par gjestî pal miôr la organizazion e i spazis limitâts, si à di notâsi; si pues telefonâ ae Biblioteche al numar 0433487951, o pûr scrivi a biblioteca@comune.tolmezzo.ud.it .

I zovins a varan dongje i professôrs che a stan daûr de ludoteche e une educadore de cooperative Itaca, esperte di zûcs di taule, impegnade intai progjets de Aree di Svilup di Comunitât dal Servizi sociâl dai Comuns de Cjargne.