Cjatìnsi – Incontriamoci
A Glemone un progjet par personis a partî dai 65 agns di etât par promovi il benstâ sociâl e l'«invecjament atîf»
Di cualchi an al è atîf tal teritori dal Glemonàs e dal Cjanâl dal Fier-Valcjanâl il progjet «Cjatìnsi/Incontriamoci» dedicât a dutis lis personis a partî di 65 agns di etât che a vuelin vivi il lôr timp in maniere ative.
Il progjet, che al à dât vite a svariâts grups di anzians, al smire a promovi il benstâ personâl e sociâl in cetantis formis: stimolant lis relazions e il dialic; incoragjant lis personis a sperimentâ ativitâts manuâls, creativis e espressivis, favorint la cognossince de storie e de culture locâl midiant di incuintris cun esperts, proiezions di documentaris e filmâts, visitis a museus,
mostris, zardins botanics, e v.i.; contribuint ae realizazion di progjets a pro de comunitât.
Ducj i grups a condividin ancje moments conviviâi in ocasions specifichis, o ae fin di zîrs sul teritori o pe conclusion di laboratoris particolârs.
In cierts comuns cheste esperience e à vût un caratar ocasionâl (par esempli a Vençon e a Tarvis, comuns dulà che il progjet si è disvilupât cuntun sôl cicli di incuintris), in altris e va indenant cun continuitât. A Bordan, Montenârs, Osôf e Resiute, par esempli, cheste esperience si disvilupe cun almancul doi ciclis di incuintris ad an, te Vierte e te Sierade. A Bordan, Glemone e Montenârs al è stât inviât ancje un filon intergjenerazionâl che al à cjapât dentri i arlêfs di dôs Scuelis Primariis e di une Scuele de Infanzie.
A Glemone dal Istât dal 2020 al Istât dal 2025 il progjet al è stât atîf par dut l'an, al inizi cun incuintris ogni cuindis dîs e, cul mês di Avrîl dal 2025, ogni setemane in gracie de disponibilitât di dôs sedis: il Laboratori didatic sul taramot in place Municipi n. 5, metût a disposizion dal Ecomuseu des Aghis dal Glemonàs, e la sede dal servizi S.I.R.I.O. in vie Marzars n. 41, metude a disposizion de Cooperative Itaca. La condivision dai spazis e à favorît il consolidament di colaborazions positivis cun dutis dôs lis realtâts, par esempli par meti adun la Mape di comunitât dal centri storic di Glemone par cure dal Ecomuseu des Aghis e par ativitâts educativis e di inclusion sociâl cu la Cooperative Itaca.
I incuintris dal grup di Glemone si davuelzin ogni miercus des 10 aes 12.
L'aspiet relazionâl al caraterize la esperience di ducj i grups, che dal mês di Zenâr 2026 a vuê a àn viodût la partecipazion di cirche 50 personis. I anzians che si son zovâts dal progjet di cuant che al è stât inviât a vuê a son plui di 110. Il dialic e il scambi a caraterizin ogni incuintri e a son une font di benstâ pai partecipants, simpri propositîfs e vierts a gnûfs ingrès. Cualchi partecipant al ufrìs
il so supuart a personis che no son autonomis tai traspuarts compagnantlis cui lôr mieç tes sedis dulà che si davuelzin lis ativitâts.
Stant ai partecipants, il progjet al permet di «cognossi altris personis e meti in vore il cerviel, parcè che al è simpri alc ce imparâ, soredut se al è ancje divertent, come costruî zeuts o fâ il sâl aromatizât cu lis jerbis».
Cetant preseâts a son i incuintris dulà che si presentin esperiencis particolârs, par esempli «il Cjamin di Sant Benedet (…) acompagnât di bielis fotografiis, tant che mi à fat sintî propit di partecipâ», al conte un partecipant. Ducj a gradissin une vore i moments di condivision: «ancje lis nestris visitis vuidadis e i nestris gustâs insiemi, come ancje il judâsi a vicende in câs di bisugn. Dut fat in maniere semplice, spontanie e familiâr», e conferme une altre partecipante. «Il progjet Cjatìnsi al è une maniere par stâ dongje tra di nô, par socializâ. Mi plâs une vore dut ce che o fasìn, des proiezions di documentaris o fotos aes cjacaradis denant di un cafè o di un gustâ, o lis jessudis sul teritori, come la gjite ae Oasi des Cicognis di Feagne o ae Mostre di Ilustrazion pe Infanzie», al comente cualchi iscrit. «Cjatìnsi al è il plasê di passâ un pâr di oris insiemi e di imparâ robis gnovis.
Pazience se o dismenteìn alc, ma la veretât e je che si impare simpri. Par me, mi è restât tal cûr il progjet "T-Essere", un cors di tiessidure su telâr cu la lane tignût di formadoris professionistis», e conte une altre partecipante.
«Cjatìnsi» al è un progjet ideât e promovût dal Servizi Sociâl dal ambit teritoriâl dal Glemonàs e dal Cjanâl dal Fier-Valcjanâl (gjestît de Aziende sanitarie universitarie Friûl Centrâl) e metût in vore midiant de colaborazion de Cooperative Sociâl Aracon (che e aderìs ae Associazion Temporanie di Imprese «Cooperative Itaca – Universiis – CODESS FVG – Aracon»
che si è adiudicade l'apalt «Servizi finalizât ae gjestion di intervents, servizis e progjets pes personis e pe comunitât» afidât de Aziende Sanitarie Universitarie Friûl Centrâl, ent gjestôr dal Servizi sociâl dai Comuns), cu la poie e la colaborazion dai Comuns e di cetantis realtâts dai teritoris, come i za nomenâts Ecomuseu des Aghis dal Glemonàs e Itaca Cooperativa
Sociale Onlus.
Ducj i incuintris a son sore nuie.
Par informazions sul program e par notâsi si puedin contatâ i operadôrs de Cooperative Aracon (345 1198456).
Par informazions di caratar gjenerâl sul progjet si pues contatâ il Servizi sociâl dai Comuns ai numars 0432 989520 e 347 9517745 (Aree promozion e prevenzion).