Fisiche Mediche Sanitarie: machinaris gnûfs cul contribût impuartant di Fondazione Friuli
vinars 19 di Avrîl dal 2024
La Fondazione Friuli e à contribuît che al è pôc a comprâ imprescj gnûfs di fisiche mediche, pe struture di Fisiche Sanitarie dal Ospedâl di Udin, par fâ verifichis dosimetrichis in radioterapie cun dose alte.
Chest contribût si inserìs intun progjet che al jere za stât inviât, che al permet di miorâ la cualitât des verifichis dosimetrichis e di podê doprâ imprescj de stesse tipologjie su plui machinaris intal stes timp, otimizant la organizazion dal lavôr daûr des necessitâts clinichis.
Tal detai, a son stâts comprâts doi elements che si doprin par provâ e calibrâ i machinaris, une stazion di monitorament ambientâl e une cjamare a jonizazion: a son imprescj di pueste pai trataments di radioterapie cun dose alte. In plui, ai fisics sanitaris de struture al jere stât fat un cors di formazion su chest argoment intal 2023.
La Fisiche Sanitarie e je direte dal dotôr Paolo Scalchi e si ocupe di ativitâts sanitariis, di valutazion, control e gjestion che a àn a ce fâ cu la fisiche aplicade ae medisine; plui in particolâr, de metodologjie pe diagnosi e pe terapie e des tecnologjiis che a doprin lis radiazions, sedi jonizantis che no. E lavore a stret contat cu la Radiologjie, la Radioterapie e la Medisine Nucleâr. Cun di plui, e cure la sigurece dai lavoradôrs e de popolazion cuant che si doprin radiazions, ancje chês jonizantis.
Il dotôr Paolo Scalchi: “O ringracii la Fondazione Friuli par chest so impuartant contribût: al è un progjet fondamentâl pe utence de struture di ASUFC che e rive culì di dutis lis bandis dal Friûl-Vignesie Julie, ma ancje di fûr regjon. In cheste maniere o vin podût miorâ la cualitât dai nestris imprescj sanitariis e duncje ancje lis curis radioterapichis”.