Fedriga-Riccardi, plui di 21 milions pal ospedâl e pal distret di Tisane

Inaugurade ancje une TAC gnove di ultime gjenerazion

"Midiant de disponibilitât di plui di 21 milions di euros o podarìn potenziâ e modernizâ un presidi ospedalîr che al è strategjic pe zone de Basse Furlane, ancje cu la ativazion di une Tac di ultime gjenerazion che e à prestazions une vore altis. Al è un risultât impuartant, otignût cul sfuarç straordenari fat de Regjon, finalizât par dâ rispuestis simpri plui eficientis e apropriadis aes domandis di salût de comunitât".

Lu àn marcât il governadôr dal Friûl-Vignesie Julie, Massimiliano Fedriga, e il vicegovernadôr e assessôr cun deleghe ae Salût, Riccardo Riccardi, intervignûts chest dopomisdì a Tisane te presentazion des liniis di intervent e dai invistiments pe atuazion dal Pnrr e dai fonts regjonâi e statâi pal presidi ospedalîr di Tisane e pal Distret sociosanitari Riviere Basse Furlane; ae presentazion a àn partecipât i sindics dai Comuns dal Ambit teritoriâl Riviere Basse Furlane, il sindic di Tisane, Lanfranco Sette, e il diretôr gjenerâl de Aziende sanitarie universitarie Friûl Centrâl (AsuFc), Denis Caporale.

"L'intervent al previôt la ativazion di un ospedâl di comunitât e de cjase de comunitât inte aree dal presidi ospedalîr di Tisane: par ospitâ al miôr i servizis sanitaris, al puest dal paveon vecjo, si fasarà sù un edifici dal dut gnûf. I fonts a disposizion a rivin a 10 milions di euros, che di chei, plui di 5,8 a son dâts de Regjon", a àn sclarît il governadôr e il vicegovernadôr. La gnove struture e varà une sô jentrade, autonome, e e sarà fate su plui plans, cuntun parc di machinis dedicât.
Passe 11 milions di euros a saran impleâts par potenziâ la rêt ospedaliere: a laran plui o mancul 3 milions pal adeguament dal pront socors; 600 mil euros cirche, pe creazion di altris 8 puescj jet te terapie semiintensive; 5,4 milions pe ristruturazion e pal adeguament des degjencis e par adatâ il presidi ospedalîr daûr des normis antifûc; plui di 1,6 milions par 20 puescj jet post acûts (ex Rsa) e 650 mil euros pe Tac gnove e pal adeguament de aree radiologjiche.
Dopo, il governadôr e il vicegovernadôr a àn partecipât ae cerimonie di inaugurazion de Tac gnove dal presidi ospedalîr di Tisane: al è un tomograf avanzât che al permet studis angioTc cuntune risoluzion une vore alte e che tal stes timp al è bon di furnî un nivel di detai impuartant e la scansion di volums grancj, ancje di dut il cuarp, in pôcs seconts. Lis prestazions dal tomograf a vierzin la strade a gnovis pussibilitâts diagnostichis tal cjamp vascolâr, chirurgjic e ortopedic.
La Tac gnove si zonte al mamograf di ultime gjenerazion, che al è za atîf, e a une aree senologjiche di ecelence.
Infin, e je stade consegnade la ambulance che e je stade comprade graciis a une donazion privade di 50.000 euros dal citadin Roberto Da Re, par cont di Marina Resort Punta Gabbiani Spa di Maran.

Font Regjon F-VJ