Sabide ai 18 di Avrîl i miedis interniscj di FADOI e ANÌMO in place a Udin par visitis e conseis di salût ai citadins
E torne sabide ai 18 di Avrîl dal 2026 la Tierce Zornade Nazionâl de Prevenzion, promovude di FADOI (Federazion des Associazions dai Dirigjents Ospedalîrs Interniscj) e ANÌMO (Associazion Nazionâl Infermîrs di Medisine Interne) patrocinât di ASUFC e cun iniziativis in 23 placis talianis.
Pal Friûl-Vignesie Julie la iniziative e sarà ospitade di Udin, in place Sant Jacum des 10:00 aes 17:00: in colaborazion cu la Crôs Rosse Taliane, miedis e infermîrs a saran a disposizion dai citadins par visitis e misurazions di glicemie, colesterôl e altris parametris vitâi e a daran conseis sui stîi di vite corets e su la prevenzion des malatiis cronichis plui frecuentis.
La iniziative, a acès libar e cence bisugne di notâsi, e nas cul obietîf di svicinâ la sanitât ai citadins e promovi une cussience plui fuarte de impuartance de prevenzion e dai stîi di vite sans. Vie pe zornade si podaran ricevi indicazions personalizadis e materiâi informatîfs utii par meti in pratiche compuartaments corets te vite di ogni dì.
Dâts resints a mostrin come che, in Italie, la prevenzion no sedi puartade indenant in maniere adeguade: cuasi il 50% de popolazion in chest moment e pese masse o e je obese, cuasi il 40% de popolazion e à la pression alte e la prevalence de dislipidemie e presente percentuâls similis. Cun di plui, cirche il 6% de nestre popolazion in chest moment e je diabetiche e la abitudin di fumâ e interesse il 20% de popolazion taliane e e sta di gnûf cressint ae svelte soredut tra i zovins.
"Come miedis o viodìn ogni dì lis consecuencis di stîi di vite scorets. La medisine moderne e à fat pas di zigant tes curis, ma no podìn limitâsi a intervignî cuant che la malatie si è za manifestade: o vin di prevignîle". Cun chestis peraulis il president regjonâl FADOI-F-VJ, Fabio Fiammengo, e il past president, Stefano De Carli (diretôr de Medisine di San Denêl), a presentin la iniziative. "I dâts sientifics a fevelin a clâr - a evidenziin - la plui part des patologjiis cardiovascolârs e metabolichis a podarès jessi limitade une vore midiant di abitudins sanis. Sabide o sarìn a disposizion in place par dute la zornade. E sarà une ocasion preziose pai citadins par informâsi, confrontâsi cun nô e ricevi sugjeriments concrets su cemût miorâ il propri stîl di vite".