"Eppure lo nego": presentât il videoclip fat dal laboratori di songwriting diret di Marco Anzovino

Tai mês di Fevrâr e di Març, un grup di adolessents che a son assistûts dal Ambulatori Diabetologjic de SOC Cliniche pediatriche di Udin de ASUFC al à partecipât a un laboratori musicâl di "songwriting" (scriture di cjançons) diret dal educadôr e musicoterapeute Marco Anzovino.

Il progjet al è stât inmaneât de equipe dal ambulatori cul aiût de Associazione Bambino in Ospedale di Udin (ABIO Udine) e cu la colaborazion de Associazione Friulana Famiglie Diabetici.

La zornade conclusive e je stade joibe ai 20 di Març te Sale Polifunzionâl dal Presidi Ospedalîr Sante Marie de Misericordie di Udin, là che, in presince ancje des fameis, al è stât presentât il videoclip intitulât "Eppure lo nego": i zovins a àn scrit e cjantât il test, cul acompagnament di Marco Anzovino, di une volontarie de ABIO Udine e de Dot.e Francesca Franco, miedi de cliniche e referente dal setôr diabetologjic e endocrinolic.

I zovins a àn imparât a cognossisi e a esprimisi cu la musiche, scoltant lis cjançons dai lôr cjantants preferîts, scuvierzint lis vôs dai lôr compagns e infin la lôr stesse vôs. Il percors al à permetût ai zovins di vivi une esperience di grup di no dismenteâ dulà che a àn cjatade la libertât e il coraç di pandi cu lis peraulis lis emozions e i argoments che ur parevin plui impuartants. Ancje se a condividin la patologjie, i fantats no àn palesât la esigjence di fevelâ dal diabete ni si son lassâts condizionâ intant des ativitâts.

"Eppure lo nego" al è un dialic bande cualchidun che al è lontan; al pant la nostalgjie pai moments passâts, il jessi cussients di no vê simpri vût la olse di frontâ lis situazions e il vê vût bisugne di platâ a se stes e a chei altris chestis emozions.  Il nivel emotîf dal toc al è grant, tignint cont de etât dai zovins, che a àn dai 11 ai 15 agns. No àn vût nissune pôre di misurâsi, di fâ vignî fûr lis lôr capacitâts, i lôr talents e i lôr sintiments, come che si viôt tal videoclip fat cui realizadôrs di videos Matteo Pavanello e Francesco Guazzoni e i fonics Paolo Piuzzi e Massimo Rispoli che a àn metût sù un studi mobil te biblioteche de Pediatrie.

"I fantats a jerin pardabon emozionâts e viodiju contents ae fin di ogni incuintri e je stade la sodisfazion plui grande." - e à declarât la dotore Franco "Come che Anzovino al insegne, la vite e je come la musiche, parcè che di fat e à bisugne di ritmi, che al segne il pas de cuotidianitât, di melodie che ognidun al dopre par esprimi se stes e di armonie, ven a stâi la capacitât di stâ ben cun chei altris. Chescj trê elements a son fondamentâi tal percors di cressite dai nestris zovins e ancje tal gjestî il diabete. I fantats a puartaran a cjase massime i "no rivi" che si son trasformâts te bielece di "Eppure lo nego". Chest percors al deventarà par sigûr une oportunitât di riflession te pratiche cliniche cuotidiane"

Un agrât particolâr i va ae Associazion ABIO Udine che e colabore in maniere costante cu la SOC Cliniche Pediatriche di Udin tal realizâ intervents pal benstâ dai fruts e dai fantats, ae Associazione Friulana Famiglie Diabetici che e sosten ducj i progjets di sensibilizazion e i progjets educatîfs e formatîfs indreçâts aes personis cul diabete.