A Tisane tantis donazions pe Pediatrie

Ancje chest an, in ocasion dal Nadâl, tantis associazions di volontariât, grups e ancje citadins privâts a àn fat donazions impuartantis e inmaneât iniziativis pai piçui pazients e pal personâl sanitari dal repart di Pediatrie dal Ospedâl di Tisane.

Fra i regâi, a son ancje imprescj sanitaris preziôs par assisti i fruts, come par esempli un spirometri, che al è fondamentâl par esaminâ chei piçui che a patissin di problemis respiratoris come la asme alergjiche; chest strument si è rivâts a comprâlu graciis ai bêçs di dôs donazions gjenerosis fatis dal grup di motocicliscj di Munic “amici Bros di Lignano” e di Eva, une mame di Tisane.

Une altre donazion impuartante che e je daûr a rivâ e je chê de Crôs Rosse di Tisane dal Comitât di Udin, dedicade ai plui piçui: une scune moderne e furnide pal durmî condividût (“co-sleeping”) pai frutins a pene nassûts e di lat, che e permet ae mari di viodi dal neonât in maniere plui sigure e comude.

Di là di cheste donazion gjenerose, ancje chest an e je lade indenant la colaborazion cu la Crôs Rosse, in particolâr pal progjet “sollievo” indreçât ai cui che al patìs di disturps dal compuartament alimentâr e ai siei gjenitôrs, graciis al contribût fondamentâl dai volontaris che cun grande sensibilitât si son impegnâts a viodi di chescj pazients, dedicant cualchi ore dal lôr timp libar par puartâju dal repart al Centri Diurni.

Altris iniziativis, invezit, a son stadis pensadis par regalâ ai fruts e ai fantats une atmosfere plui legre in chestis zornadis di Nadâl: il grup dai Alpins di San Zorç di Noiâr, di fat, al à donât dolçuts di ogni gjenar e peluches colorâts ai piçui ospits de Pediatrie, graciis a doi simpatics Barbis Nadâl che a àn visitât il repart cun grande emozion e gjonde dai fruts e dal personâl sanitari.

Cun di plui, il stes grup dai Alpins al à volût onorâ ancje chest an il repart di pediatrie cuntune donazion gjenerose: i bêçs a vignaran doprâts par comprâ bens par puartâ in miôr la assistence dai fruts.

Simpri i Alpins a son stâts i protagoniscj di une altre iniziative emozionante e significative, dedicade ai dipendents di ducj i reparts dal Ospedâl di Tisane: par ringraciâ il personâl pal lavôr fat, a àn consegnât dolçuts di Nadâl, puartant indenant une tradizion che e jere tacade tai mês complicâts dal covid 19.
Il grup dai amîs di Roncjis, po, al à donât tancj biei zuiatui, un pinsîr pardabon sensibil, massime tes fiestis di Nadâl, che al judarà i fruts ricoverâts in Pediatrie a passâ lis zornadis in maniere plui serene.

Un altri regâl une vore preseât al è stât chel di mame Grazia, che ancje chest an e à volût pensâ ai fruts mancul fortunâts, ricoverâts tal periodi di Nadâl, donantjur colôrs, libris e albums di colorâ par dutis lis etâts cun chê di dâur la pussibilitât di svagâsi par cualchi ore.

Ancje chest an a son rivâts in Pediatrie i regâi de bande dai fruts e des insegnantis de Scuele de Infanzie “Piccola Resi” di Tor di Zuin: albums une vore biei di colorâ “colora che ti passa”!, e un poster di Nadâl plen di colôrs fat dai fruts cui auguris di bon Nadâl ai fruts e al personâl dal Repart, un regâl che al à scjaldât il cûr a ducj e che al à fat deventâ il repart inmò plui biel.

Une iniziative a sorprese che ae vilie di Nadâl e à puartât une bugade di ligrie e di maravee irefrenabile e je stade la rivade di un Barbe Nadâl musicist, cjantarin e chirurc che, acompagnât des assistentis infermieris e balarinis, al à inflamât la atmosfere su lis notis di Feliz Navidad.

La dot.e Elisabetta Miorin, come diretore de Struture e a non di dut il grup di miedis e di infermîrs, e ringracie di cûr dutis lis associazions, i grups e i citadins privâts che cun chestis donazions e iniziativis dedicadis ai fruts de Pediatrie, dutis impuartantis e significativis, a testemonein l’amôr, la ricognossince e il grant supuart de bande de comunitât a pro de Pediatrie di Tisane.