Donazion pe Unitât Spinâl dal IMFR Gervasutta di bande de Associazion Due Pistoni di San Denêl
vinars 29 di Dicembar dal 2023
La Unitât Spinâl dal IMFR Gervasutta e à vût de Associazion Due Pistoni une gnove strumentazion di destinâ ae struture par facilitâ esams e prestazions specialistichis.
In particolâr, la Associazion e à regalât un strument par fâ esams video urodinamics e uroflussimetriis par studiâ il funzionament de vissie in personis che a àn problematichis neurologjichis (lesion de medole, Parkinson, Sclerosi Multiple, lesions gravis dal cerviel, ictus cerebrâi) e no neurologjichis (esits di intervents gjinecologjics, diagnostiche prime di intervents gjinecologjics...), misture di problematichis urologjichis.
Il machinari par video urodinamiche regalât al è il prin in Friûl a jessi dal dut wireless par rindi plui facil sei l’ûs di bande dal professionist sei par sigurâ la riservatece te esecuzion di bande de persone sot studi.
A chest si zontin cuatri struments par eletroterapie dal paviment pelvic (doi par stimolazion eletriche funzionâl e doi par bio feedback) che a judin il fisioterapist tal tratament riabilitatîf, facilitant il reclutament de muscoladure specifiche di riabilitâ.
La donazion de Associazion “Due Pistoni” e je stade pussibile in graciis di une racuelte di fonts rivâts di realtâts locâls furlanis (diviers imprenditôrs e donazions singulis di privâts) che in massime part a àn volût restâ tal anonimât.
Il machinari di urodinamiche al è doprât in colaborazion tra i miedis dedicâts ae diagnostiche li dal servizi di urogjinecologjie (Dr.sse Martina Arcieri, Dr. Giuseppe Baccarini).
In graciis ancje di chestis strumentazions, l’IMFR Gervasutta al è in stât di jessi struture di riferiment pe diagnostiche e pal tratament par une utence largje cu lis problematichis ditis parsore.
La Associazion “Due Pistoni” e je une realtât di San Denêl e cun cheste altre donazion e pant la sô vicinance aes problematichis peadis ae salût dai pazients, dedicant iniziativis e racueltis di fonts di destinâ aes struturis sanitariis e no dome.
Il dotôr Biasutti, diretôr dal Dipartiment, e la dotoresse Bizzarini, diretore de struture, a disin: “O ringraciìn la Associazion e ducj i donadôrs che a àn permetût cheste donazion, che cun cheste gnove strumentazion e permet di fâ visitis e esams ancjemò plui precîs par cualchi patologjie che a cjapin dentri plui specialitâts e professioniscj”.
