Cliniche pediatriche di Udin: UNICREDIT e done i furniments de sale di spiete graciis ae associazion ABIO

I fruts che a rivin in Ospedâl par une visite a varan cumò a disposizion une aree zûcs dute par lôr par divertîsi prime di jentrâ dal miedi: UNICREDIT e à di fat regalât ae ABIO Udin i furniments de sale di spiete dai ambulatoris pediatrics, che i fruts a frecuentin prin de visite, logâts tal plan tiere dal paveon Petracco dal Ospedâl Sante Marie de Misericordie.

ABIO e à po prontât la sale di spiete de Cliniche Pediatriche par fâle deventâ une vere aree zûcs: e je la rafigurazion di un ambient di cjase cuntune cjasute cu la mobilie di len, taulins, cjadreis e divanuts a misure di frut e une librarie li che si podin meti libris e zûcs. Il valôr dal materiâl donât al è di cirche 10.000 euros.

Al è di tancj agns aromai che la associazion ABIO e jude midiant de sô ativitât volontarie la Cliniche Pediatriche di Udin. Il lôr impegn costant e preziôs al è stât fondamentâl vie pai agns pe cure e pal acet in ospedâl dai piçui pazients, sedi cuant che a àn di jessi ricoverâts in repart o in Day Hospital, sedi, che nol è tant, cuant che i fruts a jentrin tai ambulatoris specialistics de Cliniche Pediatriche.

Renzo Chervatin, Responsabil Svilup Teritoris Nord Est: “Il progjet al è tra chei selezionâts pal Font Carta Etica UniCredit, parcè che o vin capît il so grant impat a supuart dai fruts e des lôr fameis. O ringraciìn Abio onlus par vê creât la conession cuntune ecelence come il repart Pediatric dal Ospedâl di Udin. O sin ancjemò une volte contents di contribuî al ben des comunitâts li che o sin atîfs”.

La professore Paola Cogo, diretore de Cliniche Pediatriche: “O ringracii Unicredit par cheste donazion preziose, che par nô e rapresente un jutori grant par dâ acet al frut e ae sô famee intun ambient cjalt e siôr di empatie, e la Associazion ABIO che e je une part fondamentâl di chest progjet. I fruts a spietin la visite zuiant e chest al è une vore util ancje par valutâ il svilup psicomotori e di relazion dal frut, aspiets fondamentâi pe visite in etât pediatriche. Une metodiche gnove par fâ la visite pediatriche, che nus permet une valutazion plui complete e precise dai nestris piçui pazients, cjapant dentri ancje il rapuart cui lôr gjenitôrs e cui lôr coetanis tant che espression de cressite neurointeletive e psicologjiche dal frut”.