Donazion ae RSA dal Distret sociosanitari di Glemone
Feder Cacciatori Riserva di Caccia di Gemona del Friuli e Associazione Allevatori FVG a donin 7 televisôrs
In gracie dai fonts cjapâts sù in ocasion de fieste dal formadi di Glemone lis associazions Feder Cacciatori Riserva di Caccia di Gemona del Friuli, e Associazione Allevatori FVG a àn donât 7 televisôrs ae RSA dal Distret sociosanitari di Glemone, cul obietîf di contribuî al benstâ dai ospits e rindi plui comude la lôr vite di ogni dì.
La consegne e je stade fate vinars ai 16 di Otubar, ae presince dai dirigjents des associazions e di cetancj dipendents sanitaris e aministratîfs.
Il Diretôr dal Distret sociosanitari Gianni Borghi al à ringraciât di cûr i promotôrs de iniziative, evidenziant la impuartance e il significât ancje di piçulis azions concretis a pro de RSA, e ancje il valôr dal fâ e dal jessi di supuart pe comunitât.
Une azion piçule, risultât dal impegn in comun, ma che e testemonie il valôr di une comunitât vive e ative, che e sa stâ daûr dai siei citadins plui debii.
Al incuintri a àn partecipât Marco Bassi, Diretôr de Associazione Allevatori FVG, e Filippo Visentin, vicepresident di Feder Cacciatori Gemona.
Un ringraciament particolâr al va ancje ai assessôrs Raffaella Zilli e Giovanni Venturini in rapresentance dal Comun di Glemone, pal preziôs supuart ae iniziative che e à permetût di cjapâ sù i fonts.