Prime donazion di placente a Udin
joibe 6 di Avrîl dal 2023
E je stade fate a Udin la prime donazion di placente in regjon, in graciis de colaborazion tra la Cliniche di Ostetricie e Gjinecologjie dal Ospedâl di Udin, il Centri Regjonâl Traplants e la Bancje dai Tiessûts dal Venit.
La donazion no à consecuencis su la mame o sul frutin e e à une procedure diferente e separade de donazion dal sanc dal cordon umbilicâl; dopo dal tratament de placente par separâ la membrane amniotiche, un dai siei components, cheste e ven conservade te Bancje dai Tiessûts dal Venit e metude a disposizion dai reparts che le domandin.
La membrane amniotiche, che par solit e ven scartade dopo dal part, e je dotade di capacitâts rigjenerativis une vore buinis e duncje e pues jessi doprade cun sucès in situazions clinichis complicadis, tant che lis ustions slargjadis, lis ulceris dificilis di vuarî o, se polverizade e metude intun coliri, facilitâ la vuarison di feridis dal voli.
“La placente si pues donâ cuant che il part si fâs cuntun tai cesari programât dopo de 35e setemane e no son malatiis impuartantis te mame o tal frut. Il personâl sanitari de Cliniche di Ostetricie, vie pe gravidance e prin dal cesari, i propon ae mari la pussibilitât di donâ la placente” e spieghe la professore Lorenza Driul, diretore de Cliniche.
Un risultât impuartant di bande dal sisteme traplants dal F-VJ, rivât dopo pocjis setemanis dal straordenari intervent record di 8 traplants in regjon tal zîr di 30 oris.