Donazion pe Pediatrie di Tumieç di bande de Associazion Luca Onlus

Ai 31 di Otubar passâts te Aula Magna dal Presidi Ospedalîr di Tumieç si è tignude une piçule cerimonie di ringraciament pe donazion ae Pediatrie di bande de Associazion Furlane Oncologjie Pediatriche Luca ODV.

A son stâts donâts un dispositîf di supuart respiratori no invasîf a flus alts AIRVO che al covente par dâ fûr ossigjen a flus alts, cjalts e umidificâts, e un machinari medic une vore evolût par monitorâ i parametris: si trate di imprescj di ultime gjenerazion che a permetin di miorâ lis curis e la assistence pai piçui pazients e a permetin di continuâ a garantî sigurece aes fameis dal teritori che a fasin riferiment al Presidi di Tumieç.

La cerimonie si è davuelte ae presince dal President de Associazion Luca Andrea Muraro, dal Vicepresident Gianluca Mazzei e Andrea Nadali insiemi cui rapresentants de Direzion Mediche di Presidi Maria Zigotti Fuso e Marzia Moro, Ingrid Toller, diretore de Pediatrie di Tumieç, e dal personâl dal compart e de dirigjence de stesse Struture.

La Associazion Luca, che di pôc e à fat fieste pai 25 agns de sô fondazion, e garantìs il massim impegn tal sostignî lis situazions plui fragjilis, in particolâr tal ram de Oncologjie Pediatriche, mantignint intal stes timp l'obietîf di favorî la ativitât di cure a 360°, stant atents di cjapâ dentri ancje lis realtâts periferichis.