Donazion pe Pediatrie e pe Ostetricie di Tumieç di bande de Associazion "Il Bruco e la Farfalla"

La Associazion "Il Bruco e la Farfalla", nassude a Paulâr ai 2 di Otubar 2020 par volontât di gjenitôrs di fruts cun disturps dal spetri autistic, e à donât une selezion di libris di leture in CAA (Comunicazion Aumentative e Alternative) ai reparts di Pediatrie e Ostetricie dal Ospedâl di Tumieç.

La Comunicazion Aumentative e Alternative e je un imprest fondamentâl par favorî l'acès ae leture e ae comunicazion dai fruts che a àn dificoltât a comunicâ, judant a rindi plui inclusîf e ospitâl ancje il contest dal ospedâl. I libris che a son stâts donâts, che si zovin di simbui e supuarts visîfs, a permetin a un numar plui grant di fruts di vivi la esperience de leture in maniere partecipade e serene.

La iniziative e jentre a plen titul te suaze de mission de Associazion, che e promôf une gnove culture de assistence aes personis autistichis e e sosten percors concrets di inclusion sociâl e autonomie.  

Meti a disposizion leturis acessibilis al vûl dî ricognossi il dirit di ogni frut di capî, esprimisi e partecipâ, ancje intun moment delicât come chel dal ricovar o de permanence in ospedâl.

Midiant di cheste donazion, la Associazion e vûl sostignî il lavôr che il personâl sanitari al puarte indenant ogni dì e contribuî a rindi l'ambient dal ospedâl simpri plui atent aes necessitâts specifichis dai piçui pazients e des lôr fameis.

Ae consegne a jerin presints no dome i rapresentants de Associazion, ma ancje il personâl de Direzion Mediche, i responsabii e i operadôrs dai reparts interessâts de iniziative, a testemoneance di une colaborazion concrete tra associazions e sanitât publiche, unidis tal proposit comun di meti in prime posizion lis necessitâts dai plui piçui e des lôr fameis. 

ASUFC e ringracie la Associazion pal so at sempliç ma significatîf, che al rinfuarce la colaborazion tra realtâts associativis e ospedâl, te convinzion che fâ rêt e sedi la clâf par costruî une societât plui inclusive e solidarie.