Donazion pe Medisine e la Dialisi-Nefrologjie dal Ospedâl di Tumieç

Un at di solidarietât significatîf al à rinfuarçât il leam tra la comunitât e l'Ospedâl di Tumieç. 

Tai dîs passâts, di fat , si è tignude la cerimonie uficiâl di consegne di une donazion impuartante di bande de Associazion Patrick Catta, un contribût cul obietîf di potenziâ lis dotazions strumentâls dai reparts di Medisine e di Dialisi e Nefrologjie e di miorâ la cualitât des curis.

La associazion, nassude par memoreâ Patrick Cattarinussi, vignût a mancjâ prime de ore par colpe di un tragjic incident sul lavôr, e à volût onorâ la sô memorie trasformantle intun jutori concret pai pazients e pal personâl dal ospedâl.

La donazion e cjape dentri: trê belancis digjitâls a colone par pesâ lis personis e dôs belancis a cjadree, destinadis ae Medisine e un eletrocardiograf complet di carel, destinât ae Nefrologjie e Dialisi.

Al incuintri a àn partecipât la Presidente de associazion, Anna Cattarinussi, e il vice president Patrick Not, che il personâl dal Ospedâl di Tumieç ur à dât acet cun agrât, in rapresentance de Direzion Mediche e dai reparts che a àn ricevude la donazion.

Miedis e infermîrs a àn pandût une grande sodisfazion, evidenziant cemût che la introduzion di chescj imprescj "e incressarà in maniere significative la cualitât des curis e la assistence che ogni dì o ufrìn ai nestris pazients".

Chest nol è il prin at di gjenerositât de Associazion Patrick Catta, che si è za dimostrade atente e disponibile tai confronts des esigjencis sanitariis locâls. Il lôr impegn al dimostre cemût che la colaborazion tra il mont des associazions e lis istituzions sanitariis al pues fâ la diference, judant a costruî une sanitât che e sedi plui vicine aes personis.

A non di dut il personâl e dai pazients che a dopraran cheste preziose strumentazion, l'Ospedâl di Tumieç al à esprimût l'agrât plui sincîr.