Donazion pe Oncologjie di Tumieç

Vinars ai 4 di Avrîl, te Oncologjie di Tumieç, e je stade fate une piçule cerimonie di ringraciament pe donazion di un misuradôr di pression e di un sisteme di videoconference de bande di un grup di associazions dal teritori.

Il strument pe pression al permetarà ai pazients di misurâ i valôrs di bessôi, slizerint une part dai volums di lavôr dal personâl infermieristic; il sisteme di videoconference, invezit, al garantirà ai infermîrs e ai miedis di interagjî miôr tes riunions dal Dipartiment di Aree Oncologjiche par discuti di câs clinics intai grups di patologjiis, par partecipâ a riunions clinichis, organizativis e a events di formazion facilitant la partecipazion “a distance” a pet dai imprescj doprâts fin vuê.

La cuote vanzade e vignarà donade ae Associazion Oncologjiche Alto Friuli AIOF par sostignî i malâts oncologjics adults dal teritori.

Dut chest al è stât pussibil graciis al jutori di tantis personis che cun bonifics e ufiertis a àn contribuît a meti dongje une cifre impuartante.

Par morestâ il dolôr pe pierdite improvise di un zovin amì, une compagnie di fantats e à ideât a Çurçuvint une associazion par ricuardâ Gianluca De Rivo, la Associazion “Amici di Gianluca”, cuntun obietîf precîs: mantignî vive la memorie di un amì midiant di manifestazions par grancj e piçui, di events sportîfs, torneus di balon par racuei fonts par fruts, fameis in dificoltât, ospedâi psichiatrics e associazions benefichis dal teritori.  

Valter Fracas al à simpri supuartât la Associazion, come persone e come sindic, cence mai fâ pesâ la sô funzion: al à judât tal concret, arbitrant tai torneus o dant fûr volantins, ma ancje inmaneant riunions e Zontis tal ultin minût par podê concedi i spazis publics che a coventin pes iniziativis benefichis. In ogni ocasion publiche al ricuardave l’operât dai “Amici di Gianluca” tant che un esempli positîf e graciis aes sôs peraulis a son rivâts diviers jutoris economics dâts po in beneficence.

Dopo che al è muart, i siei familiârs a àn inviât daurman une racuelte di fonts par ricuardâlu e ae fin la Associazion e je rivade adore di esaudî il desideri di Valentina e Michele di donâ la cifre metude dongje al repart di Oncologjie dal Ospedâl di Tumieç.

Un ringraciament particolâr al va aes Associazions di Çurçuvint, massime ai organizadôrs dal “Minicross”, che a àn destinât une part dal incàs des iscrizions al Circul Culturâl La Dalbide, che al à inmaneât une racuelte intant de serade "Cirint Radis". Un grant ringraciament ancje ai Aministradôrs e ai dipendents dal Comun, e ae associazion di balon dal Ravasclêt.

Si à agrât ancje a dôs realtâts une vore dongje di Valter, che propit midiant di lui a vevi za sostignût i Amici di Gianluca: a Gianmaria, titulâr dal bar "Distribar" di Comelians che al à organizât la serade "Una birra per Valter, una birra per la solidarietà" e al Inter Club di Glemone, che al à organizât la serade "L'happy hour di beneficenza" tal ristorant "Al Pescatore" di Cjavaç.

A son stâts doi events une vore fuarts a nivel emotîf, che di une bande a àn mantignût vîf il ricuart di Valter e di chê altre a son stât determinants par rivâ a meti dongje la cifre finâl.

Un graciis di cûr ae famee e ai amîs di Valter pe donazion fate de bande di dut il personâl de Struture di Oncologjie di San Denêl – Tumieç e dai pazients che tacant di vuê a podaran doprâ il misuradôr di pression.