Donazion di libris ilustrâts pe Pediatrie di Tumieç
Tal mês di Otubar dal an passât la Pediatrie di Tumieç e je deventade presidi uficiâl "Nati per Leggere".
Il Comun di Tumieç, midiant de biblioteche civiche "Adriana Pittoni", che ancje chê e je un presidi Nati per Leggere e che e supuarte la leture fin dai prins dîs di vite, al à promovude une iniziative di donazion di libris par fruts par insiorâ il cjanton de leture dal repart, dedicât propit aes fameis e ai fruts.
In ocasion de Fieste dal Miluç 2025, la biblioteche e à metût sù un bancut di libris a ufierte libare, e il rigjâf al è stât destinât par comprâ gnûfs libris ilustrâts e cartonâts. Intal stes timp, a son stadis proponudis ancje leturis animadis pes fameis, par cure de biblioteche e di un pôcs di students volontaris de scuele secondarie di prin grât “Gianfrancesco da Tolmezzo”.
Il Club Soroptimist Alto Friuli, une realtât culturâl une vore ative tal teritori, si è metût a disposizion par colaborâ al progjet, soredut par ce che al inten l’acuist dai libris ilustrâts, midiant dal rigjâf di ufiertis gjenerosis. E je stade fondamentâl ancje la partecipazion de librarie “Il Fiammifero” di Gabriella Cosetti, che no à dome procurât ducj i libris domandâts, ma e à ancje permetût di fâ une donazion plui grande: i clients de librarie, di fat, a àn sielzût di comprâ altris libris, dant un contribût in plui ae donazion destinade ae Pediatrie.
Chê nassude ator dal progjet e je stade une sinergjie preziose tra Pediatrie, biblioteche comunâl, scuelis, associazions e realtâts dal teritori, che si son dadis adun cul obietîf comun di sostignî e di acompagnâ lis fameis e i frutins.
Une colaborazion che e je stade pussibile in gracie dal impegn condividût di tantis personis, ma soredut de volontât e dal entusiasim di lâ indevant a creâ insiemi gnovis ocasions di incuintri e di partecipazion: i beneficis de leture, come ancje il valôr de condivision e de comunitât, a restin di fat il cûr di un percors che si vûl puartâ indevant ancje cun iniziativis futuris, buinis di cjapâ dentri simpri plui citadins e realtâts dal teritori.