Donazion pe Cliniche Reumatologjiche di Udin de bande de Associazion Malâts Reumatics dal F-VJ
miercus 16 di Lui dal 2025
In ocasion dal cuarantesim aniversari de fondazion de Associazion Malâts Reumatics dal Friûl-Vignesie Julie, i fîs di Giovanni Fusari - Francesco, Paolo e Giorgio - a àn volût memoreâ la figure di lôr pari cuntune azion concrete a favôr de ricercje e de cure des malatiis reumatichis.
Di fats al è stât donât un capilaroscopi di ultime gjenerazion ae Cliniche Reumatologjiche de Aziende Sanitarie Universitarie Friûl Centrâl, li dal Ospedâl Sante Marie de Misericordie di Udin, dirzude dal professôr Luca Quartuccio: l'imprest al sarà di grande utilitât pe diagnosi precoce e il control di svariadis patologjiis reumatichis.
Ae cerimonie di consegne, che si è davuelte tal repart, a jerin presints il Diretôr Gjenerâl di ASU FC Denis Caporale, la presidente de Associazion Malâts Reumatics dal F-VJ Marinella Monte e dute la équipe de Cliniche Reumatologjiche.
La azion de famee Fusari e rapresente une testemoneance impuartante di solidarietât e di continuitât tal sostignî i pazients reumatics, tal troi dal impegn inviât cuarante agns indaûr di Giovanni Fusari cu la fondazion de Associazion.
ASU FC e vûl ringraciâ la Associazion pe enesime azion di solidarietât tai confronts des sôs struturis.