La associazion “I donatori del Sorriso" e regale un dispositîf medic ae Pediatrie di Tisane
martars 17 di Setembar dal 2024
Martars ai 10 di Setembar, tal dopomisdì, te Pediatrie dal Presidi Ospedalîr di Tisane si è tignude une piçule cerimonie pe donazion di un impuartant dispositîf pe ventilazion no invasive, il “Bubble c-pap”, fate de associazion " I donatori del Sorriso Onlus": al è un imprest fondamentâl par supuartâ e par stabilizâ i frututs cun problemis respiratoris impuartants (tant che distress respiratori neonatâl, bronchiolitis).
Ae cerimonie di consegne dal dispositîf a jerin presints il Diretôr Sanitari de ASUFC, dotôr Turello, il Diretôr dai Miedis dal Presidi dal Ospedâl di Tisane Palme, dotore Claudia Giuliani e il Diretôr de Pediatrie, dotore Elisabetta Miorin, adun cui miedis e i infermîrs dal repart.
La Associazion di volontariât e je ative in dute Italie di plui di un deceni e e à realizât tancj progjets par sostignî la assistence dai malâts, massime chei dai reparts di Pediatrie.
In cheste ocasion la ASUFC e à marcât la sô ricognossince, ringraciant une vore la Associazion ancje de bande di dut il personâl de Struture par cheste donazion di valôr che e sarà une vore utile pe assistence dai fruts.
Ancje la dotore Miorin e à ringraciât la Associazion, concludint che: "Ancjemò une volte al è di ringraciâ il mont dal volontariât che nus permet di miorâ la assistence dai nestris piçui pazients cun gnove strumentazion: chestis azions di solidarietât a dimostrin che la nestre realtât e à ancjemò valôrs une vore fuarts”.