Donazion pe Oncologjie di Tumieç
Joibe ai 23 di Otubar te Oncologjie di Tumieç si è tignude une piçule cerimonie di ringraciament pe consegne di un supuart par misuradôr di pression e di un divanut a doi puescj: la donazion e je stade pussibile gracie a Sabrina, in memorie de mame Mirena Morocutti, vignude a mancjâ tal Fevrâr passât.
Tal mês di Fevrâr, Sabrina, insiemi cui amîs e i coleghis di Mirena, e à metût adun une racuelte di fonts in sô memorie te buteghe di gastronomie Tol e Va di Tumieç. Cun ce che al è stât cjapât sù si à podût comprâ il supuart, che al integre un machinari za in ûs, e il divanut, che al fasarà stâ plui comuts i pazients intant che a spietin. Chescj bens a son stâts donâts ae Oncologjie di Tumieç tant che segn di ricognossince pes curis ricevudis di Mirena.
La storie di Mirena e je stade segnade dal amôr pe libertât, pe sô tiere e pes sôs tradizions: tal 2005 e veve inviât il laboratori Mirandò a Trep di Cjargne, tacant a produsi specialitâts tipichis dal puest, dai Cjarsons cu lis jerbis, ai gnocs di ciespis, fin ai dolçs de tradizion, custodint i segrets tramandâts de none Amabile.
Un graciis di cûr a Sabrina e ai amîs di Mirena de bande di dut il personâl de Struture di Oncologjie di San Denêl – Tumieç pe gjenerositât dimostrade e di bande dai pazients, che tacant di vuê a podaran doprâ il gnûf divanut.
Al è dovût un ringraciament ancje a Marzia Moro, che cul so preziôs contribût e à permetût di completâ in curt la procedure di acuist e di donazion.