Distret Culinâr (San Denêl): cessazion de dotore Cedolin

Il Distret sociosanitari Culinâr (San Denêl) al informe che dai 26 di Jugn dal 2024 la dotore Erminia Cedolin e cessarà la sô ativitât di miedi convenzionât tal ambit teritoriâl che al cjape dentri i Comuns di Buie, Colorêt di Montalban, Cosean, Dignan, Feagne, Flaiban, Forgjarie, Maian, Murùs, Ruvigne, Rivis Darcjan, San Denêl, San Vît di Feagne e Trep Grant, che a fasin part dal Distret Culinâr di San Denêl.

Stant che il gnûf miedi di assistence primarie nol pues jessi assegnât di ufici, par vie che la normative in materie e previôt la libertât di sielte dal citadin, si invidin i assistûts a sielzi un altri miedi tra chei dal ambit teritoriâl dal Distret Culinâr (cun disponibilitât di puescj) che la liste si pues consultâ doprant il link https://asufc.sanita.fvg.it/it/medici/, dulà che a son i oraris e lis sedis dai ambulatoris in detai.

Cemût fâ par sielzi il gnûf miedi di medisine gjenerâl

La sielte dal gnûf miedi si podarà fâ:

• midiant dal Portâl SESAMO, https://sesamo.sanita.fvg.it/sesamo/#/index, jentrant cul Sisteme Public di Identitât Digjitâl (SPID), cu la Cjarte di identitât eletroniche (CIE) o cu la Cjarte regjonâl/nazionâl dai servizis (CRS o CNS).
• mandant il modul in zonte, jemplât e firmât, ae direzion email: cambiomedicodistrettosandaniele@asufc.sanita.fvg.it sielzint il miedi tra chei che si puedin viodi sul sît aziendâl e zontant un document di identitât valit. Cheste opzion e podarà vê variazions in câs di indisponibilitât dal miedi indicât.

Si precise che lis domandis rivadis par email a saran cjapadis sù daûr dal ordin cronologjic di rivade, dentri di cuatri o cinc dîs lavoratîfs, in compatibilitât cu la viertidure dai sportei al public; dome la sielte fate li dal sportel o pûr midiant di Sesamo e sigure la atribuzion imediade dal miedi.

• midiant dal acès libar e diret, cu la letare rivade a cjase e cu la tessare sanitarie di cjarte, li dal sportel de Anagrafe Sanitarie di San Denêl, che in vie ecezionâl dai 26 di Jugn ai 2 di Lui al varà chest orari:
• miercus ai 26 di Jugn 8.30-12.30 e 13.00-17.00
• joibe ai 27 di Jugn 8.30-12.30 e 13.00-17.00
• vinars ai 28 di Jugn 8.30-12.30 e 13.00-17.00
• lunis il 1ⁿ di Lui 8.30-12.30
• martars ai 2 di Lui 8.30-12.30

Dai 3 di Lui l’Ufici de Anagrafe Sanitarie al sarà viert tes zornadis e tes fassis orariis solitis.

• midiant de spedizion vie pueste ordenarie dal modul zontât, jemplât e firmât a cheste direzion: ASUFC – Distret Culinâr – Ufici Anagrafe Sanitarie, viâl Trento Trieste 33, 33038 San Denêl.

La Anagrafe Sanitarie e je a disposizion par dutis lis informazions al numar 0432949568, di lunis a vinars, des 10.00 aes 12.00.