Distret de Cjargne: donazion pal Pont di Salût di Paluce
vinars 7 di Jugn dal 2024
Familiârs di pazients a regalin un ecograf e un eletrocardiograf
Lunis ai 3 di Jugn te sede dal Pont di Salût di Paluce a son stâts consegnâts in maniere uficiâl un ecograf e un eletrocardiograf portatii regalâts ai servizis des curis paliativis e dal servizi infermieristic domiciliâr dal Distret sociosanitari de Cjargne: un contribût de bande di citadins privâts par ringraciâ des curis che i lôr familiârs a àn ricevût.
La Diretore dal Distret, la dotore Silvia Mentil, è à ringraciât une vore pe donazion cetant preziose che e permetarà di podê fâ diagnosis ai pazients plui fragjii a cjase lôr, tal lôr jet, cence che a vedin di vignî tal ospedâl, che par lôr tantis voltis e je une fadie; tal stes timp, si contribuìs a ridusi la liste di spiete par cheste tipologjie di esams.
La dotore Barbara Branca, referente des curis paliativis pal Friûl de Alte, e à zontât i siei ringraciaments sclarint che la gjestion dai pazients a domicili no rivuarde dome la cure cliniche de patologjie dal pazient, ma e je un jutori ancje par dute la famee che e je dongje dal malât.
Chestis donazions a miorin il servizi furnît e a rapresentin une colaborazion maraveose tra la assistence sanitarie e la comunitât: al è un dai elements di fonde dal Distret sociosanitari che al zove massime a cualchi categorie di personis plui fragjilis, par esempli ai malâts oncologjics, ai anzians e ai pazients cun plui patologjiis cronichis.